ᠶᠠᠪᠤᠳᠠᠭ ᠨᠤᠮ
ᠨᠡᠶᠢᠲᠡᠯᠡᠭᠰᠡᠨ ᠴᠠᠭ᠄
2023/7/24
      ᠠᠳᠠᠯ ᠶᠠᠪᠤᠳᠠᠯ ᠤᠨ ᠬᠠᠷᠠᠭ᠎ᠠ ᠪᠠᠷ ᠠᠶᠠᠨ ᠵᠠᠮ ᠳᠤ ᠭᠠᠷᠬᠤ ᠪᠦᠷᠢ ᠬᠤᠪᠴᠠᠰᠤ ᠬᠤᠨᠠᠷ ᠰᠤᠩᠭᠤᠬᠤ ᠠᠴᠠ ᠪᠠᠨ ᠢᠯᠡᠭᠦᠦ ᠶᠠᠮᠠᠷ ᠨᠤᠮ ᠠᠪᠴᠤ ᠶᠠᠪᠤᠳᠠᠭ ᠪᠢᠯᠡ ᠭᠡᠵᠢ ᠵᠤᠪᠠᠭ᠋ᠤ ᠨᠢ ᠤᠯᠠᠨ᠃ ᠠᠩᠬ᠎ᠠ ᠡᠬᠢᠨ ᠳᠡᠭᠡᠨ ᠠᠯᠢ ᠳᠤᠷᠠᠲᠠᠢ᠂ ᠠᠯᠢ ᠲᠤᠭᠤᠳᠠᠭ ᠨᠤᠮ ᠢᠶᠠᠨ ᠠᠪᠤᠭᠠᠳ ᠭᠠᠷᠳᠠᠭ ᠪᠠᠶᠢᠯ᠎ᠠ᠃ ᠬᠦᠨᠳᠡᠯᠡᠨ ᠬᠠᠷᠢ ᠨᠤᠲᠤᠭ ᠢᠶᠠᠷ ᠶᠠᠪᠤᠬᠤ ᠮᠠᠨᠢ ᠤᠯᠠᠰᠢᠷᠠᠭᠠᠳ ᠢᠷᠡᠬᠦᠯᠡᠷ ᠬᠠᠭᠠᠨ ᠤ ᠬᠠᠲᠤᠳ ᠰᠢᠭ᠋ ᠭᠠᠩᠭᠠᠩ ᠡᠷᠬᠢᠮᠰᠦᠭ᠂ ᠴᠠᠮᠢᠨ ᠬᠠᠪᠢᠰᠦ ᠲᠠᠢ ᠵᠤᠵᠠᠭᠠᠨ ᠨᠤᠮ ᠠᠴᠢᠬᠤ ᠠᠴᠠ ᠪᠠᠨ ᠵᠠᠯᠬᠠᠭᠤᠷᠠᠳᠠᠭ ᠪᠤᠯᠤᠬᠰᠠᠨ᠃ ᠬᠠᠷᠢᠨ ᠠᠯᠠᠭᠠᠨ ᠬᠢᠷᠢ ᠴᠦ ᠭᠡᠯ᠎ᠡ ᠠᠷᠠᠳ ᠤᠨ ᠳᠠᠭᠤᠤ ᠰᠢᠭ᠋ ᠤᠩᠰᠢᠭᠠᠳ ᠤᠩᠰᠢᠭᠠᠳ ᠬᠠᠨᠭ᠍ᠬᠤ ᠦᠭᠡᠢ ᠵᠦᠭᠡᠯᠡᠨ ᠬᠠᠪᠢᠰᠦ ᠲᠠᠢ᠂ ᠨᠢᠮᠭᠡᠬᠡᠨ ᠨᠤᠮ ᠴᠦᠩᠬᠦᠯᠡᠳᠡᠭ ᠳᠤᠷᠠᠲᠠᠢ ᠪᠤᠯᠵᠠᠢ᠃ ᠠᠶᠠᠨ ᠵᠠᠮ ᠬᠤᠯᠠᠳᠠᠬᠤ ᠲᠤᠰᠤᠮ ᠰᠠᠨᠠᠭ᠎ᠠ ᠰᠡᠳᠬᠢᠯ ᠲᠠᠶᠢᠪᠤᠰᠢᠷᠠᠨ ᠡᠰ ᠪᠦᠬᠦᠨ ᠤ ᠨᠢᠳᠦ ᠨᠡᠭᠡᠭᠡᠭᠳᠡᠭᠡᠳ ᠢᠷᠡᠳᠡᠭ᠃ ᠡᠨᠡ ᠦᠶ᠎ᠡ ᠳᠤ ᠤᠩᠰᠢᠭᠰᠠᠨ ᠨᠤᠮ ᠠᠴᠠ ᠨᠡᠩ ᠬᠤᠷᠴᠠ᠂ ᠨᠡᠩ ᠡᠯᠪᠡᠭ ᠰᠢᠮ᠎ᠡ ᠲᠡᠵᠢᠭᠡᠯ ᠠᠪᠳᠠᠭ᠃ ᠠᠯᠢ ᠨᠢᠭᠡ ᠴᠠᠭ ᠮᠦᠴᠡ ᠳᠤ᠂ ᠠᠯᠢ ᠨᠢᠭᠡ ᠨᠤᠮ ᠨᠢ ᠶᠢᠷᠲᠢᠨᠴᠦ ᠶᠢ ᠬᠠᠷᠠᠬᠤ ᠮᠡᠯᠮᠡᠢ ᠶᠢ ᠮᠢᠨᠢ ᠠᠷᠴᠢᠨ ᠲᠤᠩᠭᠠᠯᠠᠬᠰᠢᠭᠤᠯᠤᠨ᠎ᠠ ᠭᠡᠳᠡᠭ ᠲᠤ ᠪᠦᠷᠢᠨ ᠢᠲᠡᠭᠡᠳᠡᠭ᠃       ᠬᠦᠬᠡᠬᠤᠲᠠ ᠠᠴᠠ ᠪᠡᠭᠡᠵᠢᠩ ᠬᠦᠷᠬᠦ ᠭᠠᠯᠲᠤ ᠲᠡᠷᠭᠡᠨ ᠳᠤ ᠭᠠᠷᠤᠯ᠎ᠠ᠃ ᠸᠠᠭᠤᠨ ᠳᠦᠭᠦᠷᠡᠩ ᠬᠦᠮᠦᠰ ᠭᠠᠷ ᠤᠲᠠᠰᠤ ᠱᠠᠭᠠᠶᠢᠭᠠᠳ ᠲᠤᠮᠪᠤᠶᠢᠯᠴᠠᠨ᠎ᠠ᠃ ᠬᠠᠵᠠᠭᠤ ᠳᠤ ᠰᠠᠭᠤᠭᠰᠠᠨ ᠬᠡᠳᠦᠨ ᠨᠦᠬᠦᠷ ᠶᠡᠭᠡ ᠵᠤᠭᠤᠭ ᠲᠡᠯᠭᠡᠵᠦ ᠶᠢᠷᠲᠢᠨᠴᠦ ᠶᠢ ᠲᠢᠭᠯᠡᠨ᠎ᠡ᠃ ᠵᠤᠭᠤᠭ ᠲᠠᠭᠠᠨ ᠬᠡᠶᠢᠷᠬᠡᠨ ᠰᠢᠯᠦᠰᠦ ᠠᠮᠠ ᠪᠠᠨ ᠦᠰᠦᠷᠭᠡᠵᠦ ᠠᠮᠲᠠ ᠰᠢᠮᠳᠡ ᠦᠭᠡᠢ᠂ ᠠᠮᠢᠳᠤᠷᠠᠯ ᠳᠠᠭᠠᠨ ᠦᠵᠡᠵᠦ ᠰᠤᠨᠤᠰᠤᠭ᠎ᠠ ᠴᠦ ᠦᠭᠡᠢ ᠶᠠᠭᠤᠮ᠎ᠠ ᠶᠠᠷᠢᠨ ᠮᠡᠳᠡᠮᠡᠬᠡᠶᠢᠷᠡᠬᠦ ᠶᠢ ᠨᠢ ᠦᠵᠡᠭᠡᠳ ᠲᠤᠷ᠎ᠠ ᠦᠭᠡᠶᠢᠴᠡᠯ ᠲᠦᠷᠦᠨ᠎ᠡ᠃ ᠢᠩᠭᠢᠵᠦ ᠤᠯᠢᠤ ᠰᠤᠯᠢᠤ ᠶᠠᠭᠤᠮ᠎ᠠ ᠶᠠᠷᠢᠵᠤ ᠴᠠᠭ ᠨᠦᠭᠴᠢᠭᠡᠬᠦ ᠶᠤᠮ ᠪᠤᠯ ᠭᠠᠷ ᠤᠲᠠᠰᠤ ᠪᠠᠨ ᠪᠠᠷᠢᠭᠠᠳ ᠲᠤᠬᠢᠯᠵᠠᠨ ᠰᠠᠭᠤᠵᠤ ᠪᠠᠶᠢᠭ᠎ᠠ ᠬᠦᠮᠦᠰ ᠢ ᠴᠦ ᠬᠦᠷᠬᠦ ᠦᠭᠡᠢ ᠰᠢᠭ ᠪᠤᠳᠤᠭᠳᠠᠯ᠎ᠠ᠃ ᠪᠢ ︽ᠪᠤᠭᠤᠨᠢᠬᠠᠨ ᠵᠤᠨ︾ ᠳᠠᠭᠠᠨ ᠨᠢᠳᠦ ᠴᠢᠬᠢ᠂ ᠵᠢᠷᠦᠬᠡ ᠰᠡᠳᠬᠢᠯ ᠢᠶᠠᠨ ᠦᠭᠭᠦᠨ ᠬᠠᠵᠠᠭᠤ ᠶᠢᠨ ᠶᠢᠷᠲᠢᠨᠴᠦ ᠠᠴᠠ ᠪᠠᠨ ᠦᠪᠡᠷ ᠢ ᠪᠠᠨ ᠲᠤᠰᠠᠭᠠᠷᠯᠠᠭᠠᠳ ᠵᠠᠯᠠᠭᠤ ᠬᠦᠭᠵᠢᠮ ᠤᠨ ᠵᠤᠬᠢᠶᠠᠯᠴᠢ ᠶᠢᠨ ᠠᠳᠠᠯ ᠠᠮᠢᠳᠤᠷᠠᠯ ᠳᠤ ᠠᠭᠤᠰᠤᠨ ᠶᠠᠪᠤᠯ᠎ᠠ᠃ ᠬᠠᠶᠠ ᠳᠤᠭᠤᠯᠳᠠᠬᠤ ᠭᠠᠯᠲᠤ ᠲᠡᠷᠭᠡᠨ ᠤ ᠪᠦᠷᠢᠶ᠎ᠡ ᠶᠢᠨ ᠳᠠᠭᠤ ᠶᠠᠭ ᠯᠡ ᠪᠤᠷᠤᠭᠠᠨ ᠤ ᠲᠤᠰᠤᠯ ︽ᠲᠡᠭᠦᠯᠳᠡᠷ ᠬᠤᠭᠤᠷ ᠤᠨ ᠭᠤᠷᠪᠠᠳᠤᠭᠠᠷ ᠨᠠᠢᠮᠡᠴᠡ ᠶᠢᠨ ᠲᠠᠪᠤᠳᠤᠭᠠᠷ ᠲᠠᠷᠤᠯᠲᠠ︾ ᠳᠡᠭᠡᠷ᠎ᠡ ᠲᠤᠰᠤᠩᠨᠠᠬᠤ ᠳᠤ ᠭᠠᠷᠬᠤ ᠳᠠᠭᠤ ᠮᠡᠲᠦ ᠰᠤᠨᠤᠰᠳᠠᠨ᠎ᠠ᠃        ᠪᠡᠭᠡᠵᠢᠩ ᠠᠴᠠ ᠬᠦᠬᠡᠬᠤᠲᠠ ᠪᠤᠴᠠᠬᠤ ᠭᠠᠯᠲᠤ ᠲᠡᠷᠭᠡ ᠰᠦᠨᠢ ᠶᠢᠨ ᠠᠷᠪᠠᠨ ᠨᠢᠭᠡᠨ ᠴᠠᠭ ᠲᠤ ᠬᠦᠳᠡᠯᠦᠨ᠎ᠡ᠃ ᠬᠠᠷᠠᠩᠭᠤᠢ ᠪᠦᠷᠤᠢ᠂ ᠹᠦ᠋ ᠶᠢᠨ ᠬᠠᠯᠠᠭᠤᠨ᠂ ᠦᠢᠮᠡᠯᠳᠦᠨ ᠲᠦᠷᠴᠢᠬᠢᠨᠡᠯᠳᠦᠬᠦ ᠬᠦᠮᠦᠰ᠃ ᠡᠨᠡ ᠤᠷᠴᠢᠨ ᠳᠤ ᠰᠡᠳᠬᠢᠯ ᠤᠨ ᠲᠠᠶᠢᠪᠤᠰᠢᠷᠠᠯ ᠤᠯᠤᠨ᠎ᠠ ᠭᠡᠳᠡᠭ ᠶᠤᠰᠤᠲᠠᠢ ᠲᠠᠮᠤ ᠪᠠᠨ ᠦᠵᠡᠨ᠎ᠡ᠃ ᠴᠦᠩᠬᠦᠨ ᠠᠴᠠ ᠪᠠᠨ ︽ᠲᠤᠤᠷᠠᠢ ᠶᠢᠨ ᠲᠦᠬᠡᠯ︾ ᠭᠠᠷᠭᠠᠵᠤ ᠤᠷᠪᠠᠭᠤᠯᠤᠯ᠎ᠠ᠃ ︽ᠪᠤᠶᠠᠨᠲᠦ ᠪᠤᠭᠤᠷᠤᠯ ᠡᠴᠢᠬᠡ ᠶᠢᠨ ᠢᠶᠠᠨ ᠭᠡᠭᠡᠨ ᠳᠤᠷᠠᠰᠬᠠᠯ ᠳᠤ ᠵᠤᠷᠢᠭᠤᠯᠪᠠ︾ ᠭᠡᠰᠡᠨ ᠨᠢ ᠰᠡᠳᠬᠢᠯ ᠳᠤ ᠲᠠᠭᠠᠯᠠᠭᠳᠠᠭᠰᠠᠭᠠᠷ ᠢᠷᠡᠭᠰᠡᠨ᠃ ᠬᠠᠶᠢᠷᠠᠲᠠᠢ ᠬᠦᠮᠦᠨ ᠳᠡᠭᠡᠨ ᠵᠤᠷᠢᠭᠤᠯᠤᠨ ᠨᠤᠮ ᠪᠦᠲᠦᠭᠡᠨ᠎ᠡ ᠭᠡᠳᠡᠭ ᠶᠠᠮᠠᠷ ᠠᠭᠤᠤ ᠰᠡᠳᠬᠢᠯ ᠪᠤᠢ᠃ ᠨᠤᠮ ᠤᠨ ᠭᠡᠷᠡᠯ᠂ ᠲᠡᠷᠭᠡᠨ ᠦᠷᠲᠡᠭᠡᠨ ᠤ ᠵᠢᠪᠠᠭᠦᠨ ᠦᠨᠦᠷ ᠪᠤᠯᠤᠨ ᠪᠡᠶ᠎ᠡ ᠶᠢᠨ ᠴᠢᠯᠡᠭᠡ ᠶᠢ ᠠᠷᠴᠢᠭᠰᠠᠨ ᠰᠢᠭ᠋ ᠬᠦᠩᠭᠡᠷᠡᠭᠡᠳ ᠯᠡ ᠶᠠᠪᠤᠴᠢᠬᠠᠯ᠎ᠠ᠃ ᠰᠠᠨᠳᠠᠯᠢ ᠰᠢᠷᠡᠭᠡ ᠶᠢᠨ ᠳᠡᠭᠡᠭᠦᠷ ᠳᠤᠤᠭᠤᠷ ᠠᠲᠤᠷᠢᠯᠳᠤᠨ ᠬᠡᠪᠲᠡᠵᠦ ᠪᠠᠶᠢᠭ᠎ᠠ ᠬᠦᠭᠰᠢᠨ ᠵᠠᠯᠠᠭᠤ᠂ ᠡᠷᠡᠭᠲᠡᠢ ᠡᠮᠡᠭᠲᠡᠢ ᠮᠠᠬᠠᠪᠤᠳ ᠦᠷᠲᠡᠭᠡ ᠳᠦᠭᠦᠷᠭᠡᠨ᠎ᠡ᠃ ᠤᠶᠤᠨᠳᠦ ᠳᠡᠭᠡᠳᠦᠰ ᠤᠨ ᠪᠤᠶᠠᠨ ᠵᠠᠶᠠᠭ᠎ᠠ ᠪᠠᠷ ᠬᠦᠮᠦᠨ ᠤ ᠲᠦᠷᠦᠯ ᠠᠷᠠᠯᠵᠢᠵᠤ ᠨᠤᠮ ᠤᠩᠰᠢᠬᠤ ᠬᠤᠪᠢ ᠲᠠᠢ ᠲᠦᠷᠦᠭᠰᠡᠨ ᠮᠢᠨᠢ ᠬᠢᠯᠪᠡᠷ ᠪᠤᠰᠤ ᠭᠡᠳᠡᠭ ᠢ ᠰᠠᠨᠠᠯ᠎ᠠ᠃      ᠶᠡᠭᠡ ᠴᠠᠰᠤ ᠤᠷᠤᠭᠠᠳ ᠬᠠᠶᠢᠯᠠᠷ ᠠᠴᠠ ᠬᠦᠬᠡᠬᠤᠲᠠ ᠪᠤᠴᠠᠬᠤ ᠨᠢᠰᠭᠡᠯ ᠭᠤᠷᠪᠠᠨ ᠴᠠᠭ ᠰᠠᠭᠠᠲᠠᠪᠠ᠃ ᠶᠠᠩ ᠵᠢᠶᠠᠩ ᠤᠨ ︽ᠪᠢᠳᠡ ᠭᠤᠷᠪᠠ︾ ᠶᠢ ᠠᠪᠤᠯ᠎ᠠ᠃ ᠦᠨᠳᠦᠷ ᠳᠤᠮᠳᠠᠳᠤ ᠳᠤ ᠰᠤᠷᠴᠤ ᠪᠠᠶᠢᠬᠤ ᠳᠠᠭᠠᠨ ᠡᠨᠡ ᠨᠤᠮ ᠤᠨ ᠰᠤᠷᠠᠭ ᠢ ᠲᠤᠭᠤᠯᠤᠭᠰᠠᠨ ᠪᠤᠯᠪᠠᠴᠤ ᠬᠢᠲᠡᠳ ᠨᠤᠮ ᠦᠩᠭᠡᠷᠡᠤ ᠤᠩᠰᠢᠳᠠᠭ ᠦᠭᠡᠢ ᠠᠴᠠ ᠰᠡᠳᠬᠢᠯ ᠳᠡᠭᠡᠨ ᠠᠪᠤᠭᠰᠠᠨ ᠦᠭᠡᠢ ᠶᠠᠪᠤᠵᠠᠢ᠃ ᠬᠠᠷᠢᠨ ᠳᠡᠬᠦᠨ ᠢ ᠡᠬᠦᠯᠡ ᠳᠠᠯᠳᠠᠯᠠᠭᠰᠠᠨ ᠤ ᠬᠢᠨᠢ ᠳᠠᠷᠠᠭ᠎ᠠ ᠤᠯᠠᠨ ᠬᠦᠮᠦᠨ ᠤ ᠶᠠᠷᠢᠬᠤ ᠶᠢ ᠰᠤᠨᠤᠰᠤᠭᠠᠳ ᠠᠪᠴᠤ ᠦᠵᠡᠬᠦ ᠰᠠᠨᠠᠭ᠎ᠠ ᠲᠦᠷᠦᠭᠰᠡᠨ ᠶᠤᠮ᠃ ︽ᠪᠢᠳᠡ ᠭᠤᠷᠪᠠ ᠪᠠᠨ ᠪᠢ ᠭᠠᠭᠴᠠᠭᠠᠷ ᠳᠤᠷᠠᠰᠤᠨ᠎ᠠ︾ ᠬᠡᠮᠡᠬᠦ ᠭᠤᠷᠪᠠᠳᠤᠭᠠᠷ ᠪᠦᠯᠦᠭ ᠪᠤᠯ ᠵᠤᠬᠢᠶᠠᠯᠴᠢ ᠶᠠᠩ ᠵᠢᠶᠠᠩ ᠤᠨ ᠦᠪᠡᠷ ᠤᠨ ᠭᠡᠷ ᠪᠦᠯᠢ ᠶᠢᠨ ᠢᠶᠠᠨ ᠲᠤᠬᠠᠢ ᠪᠢᠴᠢᠭᠰᠡᠨ ᠬᠠᠯᠠᠭᠤᠨ ᠳᠤᠷᠠᠰᠤᠮᠵᠢ᠃ ᠨᠦᠬᠦᠷ ᠴᠢᠶᠠᠨ ᠵᠦᠩ ᠱᠦ ᠲᠠᠢ ᠪᠠᠨ ᠬᠠᠷᠢ ᠭᠦᠷᠦᠨ ᠳᠤ ᠰᠤᠷᠤᠯᠴᠠᠵᠤ ᠪᠠᠶᠢᠭᠰᠠᠨ ᠠᠴᠠ ᠪᠠᠨ ᠦᠬᠢᠨ ᠪᠤᠯᠤᠨ ᠡᠪᠦᠭᠡᠨ ᠨᠢ ᠶᠢᠷᠲᠢᠨᠴᠦ ᠶᠢᠨ ᠮᠦᠩᠬᠡ ᠪᠤᠰᠤ ᠶᠢ ᠦᠵᠡᠭᠦᠯᠦᠭᠰᠡᠨ ᠬᠦᠷᠲᠡᠯᠡᠬᠢ ᠬᠠᠯᠠᠭᠤᠨ ᠳᠤᠯᠠᠭᠠᠨ ᠠᠮᠢᠳᠤᠷᠠᠯ ᠤᠨ ᠳᠤᠷᠠᠰᠤᠮᠵᠢ ᠪᠠᠷ ᠳᠦᠭᠦᠷᠡᠩ᠃ ᠤᠭᠢᠯᠠᠵᠤ ᠤᠩᠰᠢᠯ᠎ᠠ᠃ ᠭᠡᠷ ᠪᠦᠯᠢ ᠲᠠᠢ᠂ ᠵᠤᠷᠢᠬᠤ ᠬᠦᠰᠡᠯ ᠲᠠᠢ᠂ ᠲᠡᠷᠡ ᠮᠦᠷᠲᠡᠯ᠎ᠡ ᠪᠠᠨ ᠬᠠᠮᠤᠭ ᠤᠨ ᠬᠠᠶᠢᠷᠠᠲᠠᠢ ᠬᠦᠮᠦᠰ ᠲᠠᠢ ᠪᠢᠳᠡᠨ ᠨᠢᠭᠡ ᠰᠠᠷᠠᠪᠴᠢᠨ ᠳᠤ ᠠᠮᠢᠳᠤᠷᠠᠨ᠎ᠠ ᠭᠡᠳᠡᠭ ᠨᠡᠬᠡᠯ ᠬᠠᠲᠠᠭᠤ ᠤᠷᠴᠢᠯᠠᠩ ᠳᠤ ᠡᠭᠡᠯ ᠬᠦᠮᠦᠰ ᠤᠨ ᠡᠳ᠋ᠯᠡᠬᠦ ᠠᠵᠠ ᠵᠢᠷᠭᠠᠯ ᠴᠦ ᠶᠤᠮ ᠤᠤ ᠳ᠋ᠠ᠃      ᠬᠠᠮᠢᠭ᠎ᠠ ᠴᠦ ᠬᠦᠷᠦᠭᠰᠡᠨ ᠴᠦᠩᠭᠦᠨ ᠳᠤ ᠮᠢᠨᠢ ᠳᠠᠭᠠᠭᠠᠳ ᠯᠠ ᠶᠠᠪᠤᠳᠠᠭ ᠨᠢ ︽ᠤᠳᠬ᠎ᠠ ᠶᠢᠨ ᠴᠢᠮᠡᠭ︾᠃ ᠤᠯᠠᠨ ᠰᠠᠶᠢᠬᠠᠨ ᠪᠤᠭᠤᠨᠢ ᠦᠭᠦᠯᠡᠯᠭᠡ ᠪᠠᠷ ᠪᠦᠲᠦᠭᠰᠡᠨ ᠡᠨᠡ ᠨᠤᠮ ᠳᠠᠭᠠᠨ ᠪᠢ ᠮᠠᠰᠢ ᠬᠠᠶᠢᠷᠠᠲᠠᠢ᠃ ᠤᠩᠰᠢᠬᠤ ᠪᠦᠷᠢ ᠠᠮᠲᠠ ᠨᠢ ᠤᠨᠳᠤᠤ᠃ ︽ᠡᠷᠡᠬᠡᠢ ᠳᠠᠷᠤᠮ᠎ᠠ ᠵᠠᠢ ᠳᠤ ᠮᠢᠩᠭᠠᠨ ᠵᠠᠭᠠᠨ︾᠂ ᠶᠠᠳᠠᠭᠤ ᠬᠦᠮᠦᠨ ᠤ ᠤᠬᠠᠭᠠᠨ ᠠᠴᠠ ᠲᠦᠷᠦᠭᠰᠡᠨ ᠤᠬᠠᠭᠠᠨ᠃ ᠬᠦᠮᠦᠨ ᠢ ᠪᠤᠤ ᠪᠠᠰᠤ ᠭᠡᠳᠡᠭ ᠳ᠋ᠡ᠃ ︽ᠨᠤᠲᠤᠭ ᠤᠨ ᠲᠡᠩᠬᠡᠬᠡ︾᠂ ᠨᠤᠲᠤᠭ ᠠᠮᠢᠲᠠᠢ ᠬᠦᠮᠦᠨ ᠳᠤ ᠨᠤᠲᠤᠭ ᠠᠴᠠ ᠨᠢ ᠦᠭᠡᠷ᠎ᠡ ᠬᠦᠴᠦ ᠲᠠᠮᠢᠷ ᠰᠡᠯᠪᠢᠵᠤ ᠦᠭᠭᠦ ᠭᠠᠵᠠᠷ ᠬᠠᠮᠢᠭ᠎ᠠ ᠪᠠᠶᠢᠬᠤ ᠪᠤᠢ᠃ ︽ᠦᠷᠡᠲᠦ ᠠᠮᠢᠲᠠᠨ︾᠂ ᠬᠡᠯᠡ ᠦᠭᠡᠢ ᠠᠮᠢᠲᠠᠨ ᠬᠦᠷᠲᠡᠯ᠎ᠡ ᠦᠷ᠎ᠡ ᠶᠢᠨ ᠢᠶᠠᠨ ᠲᠦᠯᠦᠭᠡ ᠦᠨᠦᠴᠢᠨ ᠡᠯᠢᠭᠡ ᠨᠢ ᠦᠨᠳᠡᠯᠵᠡᠳᠡᠭ ᠢ ᠬᠡᠨ ᠡᠰᠡ ᠤᠬᠠᠬᠤ ᠪᠢᠯᠡ ᠳ᠋ᠠ᠃ ︽ᠪᠢᠳᠡ ᠢᠯᠠᠪᠠ︾᠂ ᠬᠠᠭᠤᠴᠢᠨ ᠰᠢᠷᠬ᠎ᠠ ᠰᠡᠲᠡᠷᠡᠭᠡᠵᠦ ᠲᠡᠥᠬᠡ ᠦᠨᠡᠨ ᠢ ᠦᠯᠦ ᠢᠯᠭᠠᠬᠤ ᠪᠤᠯᠤᠭᠰᠠᠨ ᠤᠳᠤ ᠴᠠᠭ ᠤᠨ ᠮᠠᠶᠢᠮᠠᠢ ᠶᠢᠨ ᠮᠦᠩᠭᠦᠨ ᠳᠤ ᠲᠤᠯᠳᠦ᠋ᠢᠳᠠᠬᠤ ᠶᠠᠳᠠᠭᠤ ᠤᠬᠠᠭᠠᠨ ᠁ ᠡᠨᠡ ᠤᠯᠠᠨ ᠰᠠᠶᠢᠬᠠᠨ ᠦᠭᠦᠯᠡᠯᠭᠡ ᠨᠦᠭᠦᠳ ᠢ ᠤᠩᠰᠢᠬᠤ ᠳᠤ ᠶᠠᠭ ᠯᠡ ᠵᠢᠷᠤᠭ᠎ᠠ ᠮᠤᠷᠢ ᠤᠨᠤᠭᠰᠠᠨ ᠶᠤᠮ ᠰᠢᠭ᠋ ᠯᠡ ᠰᠠᠶᠢᠬᠠᠨ ᠮᠡᠳᠡᠷᠡᠮᠵᠢ ᠦᠭᠳᠡᠭ᠃ ᠮᠤᠩᠭᠤᠯ ᠬᠡᠯᠡ᠂ ᠰᠡᠳᠬᠢᠬᠦᠢ ᠶᠢᠨ ᠭᠠᠶᠢᠬᠠᠮᠰᠢᠭ᠃ ᠪᠢ ᠬᠠᠮᠢᠭ᠎ᠠ ᠬᠦᠷᠪᠡᠯ ᠨᠤᠮ ᠤᠳ ᠮᠢᠨᠢ ᠳᠠᠭᠠᠭᠠᠳ ᠲᠡᠨᠳᠡ ᠬᠦᠷᠦᠨ᠎ᠡ᠃ ᠨᠤᠮ ᠢᠶᠠᠨ ᠡᠭᠦᠷᠦᠭᠡᠳ ᠶᠠᠪᠤᠵᠤ ᠪᠠᠶᠢᠨ᠎ᠠ ᠭᠡᠭᠴᠢ ᠦᠪᠡᠷ ᠤᠨ ᠲᠠᠨᠢᠬᠤ ᠭᠡᠵᠦ ᠪᠠᠶᠢᠭ᠎ᠠ ᠶᠢᠷᠲᠢᠨᠴᠦ ᠪᠠᠨ ᠡᠭᠦᠷᠦᠭᠡᠳ ᠶᠠᠪᠤᠵᠤ ᠪᠠᠶᠢᠨ᠎ᠠ ᠯᠡ ᠭᠡᠵᠦ ᠪᠢ ᠪᠤᠳᠤᠳᠠᠭ ᠶᠤᠮ᠃       ᠶᠠᠪᠤᠳᠠᠭ ᠨᠤᠮ᠂ ᠶᠠᠪᠤᠳᠠᠭ ᠶᠢᠷᠲᠢᠨᠴᠦ᠃   
ᠢᠷᠡᠯᠲᠡ᠄ ᠠᠷᠠᠳ ᠤᠨ ᠰᠦᠯᠵᠢᠶ᠎ᠡ