| ᠲᠦᠭᠦᠭᠡ ᠣᠷᠣᠭᠰᠠᠨ ᠴᠠᠭ ᠠᠴᠠ ᠪᠠᠨ ᠡᠬᠢᠯᠡᠨ ᠪᠢ ᠴᠠᠭᠠᠨ ᠰᠠᠷᠠ ᠪᠤᠯᠬᠤ ᠭᠡᠭᠴᠢ ᠬᠠᠮᠤᠭ ᠤᠨ ᠰᠠᠶᠢᠬᠠᠨ ᠶᠠᠪᠤᠳᠠᠯ ᠬᠡᠮᠡᠨ ᠪᠤᠳᠤᠳᠠᠬ ᠪᠠᠶᠢᠵᠠᠢ᠃ | ᠲᠡᠭᠡᠭᠡᠳ ᠰᠢᠨᠡᠯᠡᠬᠦ ᠠᠴᠠ ᠪᠠᠷᠤᠭ ᠵᠠᠭᠤᠨ ᠬᠤᠨᠤᠭ ᠤᠨ ᠡᠮᠦᠨᠡ ᠠᠴᠠ ᠡᠳᠦᠷ ᠤᠬᠤᠷᠢᠭᠤᠯᠤᠨ ᠲᠣᠭᠠᠯᠠᠵᠤ᠂ ᠠᠷᠭᠠ ᠶᠢᠨ ᠤᠯᠠᠷᠢᠯ ᠪᠢᠯᠢᠭ ᠤᠨ ᠲᠣᠭᠠᠯᠠᠯ ᠭᠡᠵᠦ | ᠰᠤᠷᠤᠬᠰᠠᠨ ᠲᠤᠭᠠ ᠶᠢᠨ ᠬᠢᠷᠢ ᠪᠠᠷ ᠢᠶᠠᠨ ᠬᠤᠷᠤᠭᠤ ᠳᠠᠷᠤᠨ ᠬᠢᠮᠤᠰᠤ ᠨᠢᠰᠠᠯᠤᠨ ᠬᠠᠵᠠᠭᠠᠢ ᠬᠠᠯᠠᠭᠤ ᠪᠣᠯᠴᠢᠬᠠᠬᠤ ᠠᠴᠠ ᠠᠶᠤᠵᠤ᠂ ᠲᠠᠭᠢᠨ ᠳᠠᠪᠲᠠᠨ ᠯᠠᠪᠳᠠᠭᠤᠯᠵᠤ | ᠨᠠᠷᠢᠪᠴᠢᠯᠠᠵᠤ ᠪᠠᠶᠢᠭᠰᠠᠨ ᠮᠠᠨᠢ ᠶᠠᠮᠠᠷᠬᠠᠨ ᠳᠠᠪᠴᠢᠭᠤ ᠬᠦᠰᠡᠯ ᠬᠦᠯᠢᠶᠡᠯᠲᠡ ᠠᠵᠢ᠃ | ᠪᠠᠭᠠ ᠶᠢᠨ ᠴᠠᠭᠠᠨ ᠰᠠᠷᠠ ᠶᠡᠷᠦ ᠨᠢ ᠪᠠᠯ ᠪᠤᠷᠠᠮ ᠤᠨ ᠪᠡᠯᠡᠭ ᠲᠠᠢ ᠰᠠᠭᠠᠲᠠᠳᠠᠭ ᠪᠠᠶᠢᠵᠠᠢ᠃ ᠡᠪᠦᠯ ᠣᠷᠣᠵᠤ ᠡᠳᠦᠷ ᠬᠦᠢᠲᠡᠷᠡᠭᠰᠡᠭᠡᠷ ᠯᠡ ᠡᠵᠢ ᠮᠢᠨᠢ | ᠪᠢᠳᠡᠨ ᠳᠤ ᠰᠢᠨᠡᠯᠡᠬᠦ ᠬᠤᠪᠴᠠᠰᠤ ᠣᠶᠣᠭᠠᠳ ᠶᠠᠭᠠᠷᠠᠨᠠ᠃ ᠡᠭᠡᠴᠢ ᠳᠡᠭᠦᠦ ᠪᠢᠳᠡ ᠲᠠᠪᠤᠭᠤᠯᠠ ᠡᠩ ᠤᠨ ᠦᠶᠡ ᠳᠡᠭᠡᠨ ᠥᠭᠡᠯᠡᠢ ᠨᠢ ᠡᠮᠦᠰᠦᠭᠡᠳ ᠪᠠᠭᠠᠳᠠᠪᠠᠯ | ᠪᠢᠴᠢᠬᠠᠨ ᠨᠢ ᠡᠮᠦᠰᠳᠡᠭ ᠪᠤᠯᠪᠠᠴᠤ᠂ ᠵᠢᠯ ᠴᠠᠭᠠᠨ ᠰᠠᠷᠠ ᠪᠤᠯᠬᠤ ᠳᠤ ᠡᠵᠢ ᠵᠠᠪᠠᠯ ᠪᠢᠳᠡᠨ ᠳᠤ ᠰᠢᠨᠡ ᠬᠠᠨᠲᠠᠭᠠᠰᠤ ᠥᠮᠥᠳᠦ ᠱᠠᠬᠠᠢ ᠭᠤᠳᠤᠯ ᠣᠶᠣᠵᠤ ᠦᠭᠳᠡᠭ | ᠪᠠᠶᠢᠯᠠ᠃ ᠲᠡᠭᠡᠭᠡᠳ ᠪᠤᠳᠠᠭᠠ ᠲᠡᠭᠡᠷᠮᠡᠳᠡᠬᠦ᠂ ᠭᠡᠷ ᠲᠡᠷᠭᠡ ᠴᠡᠪᠡᠷᠯᠡᠵᠦ ᠬᠤᠭ ᠲᠣᠭᠤᠰᠣ ᠭᠦᠪᠢᠬᠦ ᠭᠡᠬᠦ ᠮᠡᠲᠦ ᠶᠢᠨ ᠪᠠᠶᠢᠭᠰᠠᠨ ᠠᠵᠢᠯ ᠤᠨ ᠲᠠᠯᠢᠮ ᠳᠠᠭᠠᠨ ᠡᠵᠢ | ᠰᠥᠨᠢ ᠶᠢᠨ ᠲᠤᠰᠤᠨ ᠳ᠋ᠧᠩ ᠤᠨ ᠳᠣᠣᠷᠠ ᠰᠠᠭᠤᠵᠤ ᠣᠶᠣᠳᠠᠯ ᠣᠶᠣᠬᠤ ᠳᠤ ᠪᠢᠳᠡ ᠲᠠᠪᠤᠭᠤᠯᠠ ᠭᠦᠨᠵᠢᠯᠡ ᠳᠣᠲᠣᠷᠠ ᠠᠴᠠ ᠲᠣᠯᠣᠭᠠᠢ ᠪᠠᠨ ᠪᠤᠯᠲᠠᠶᠢᠯᠭᠠᠨ ᠮᠢᠨᠤ | ᠶᠠᠮᠠᠷ ᠬᠤᠸᠠᠷ ᠲᠠᠢ᠂ ᠴᠢᠨᠦ ᠶᠠᠮᠠᠷ ᠥᠩᠭᠡ ᠲᠠᠢ ᠭᠡᠵᠦ ᠪᠤᠯᠢᠶᠠᠯᠳᠤᠭᠠᠨ ᠪᠤᠯᠵᠠᠭᠠᠨᠠ᠃︽ᠮᠢᠨᠤ ᠬᠡᠦᠬᠡᠳ ᠤᠨ ᠬᠤᠪᠴᠠᠰᠤ ᠪᠦᠷ ᠰᠠᠶᠢᠬᠠᠨ ᠰᠢᠦ᠂ ᠡᠮᠦᠰᠦᠭᠡᠳ ᠭᠠᠷᠪᠠᠯ | ᠠᠶᠢᠯ ᠤᠨ ᠬᠥᠮᠥᠰ ᠮᠠᠭᠲᠠᠬᠤ ᠦᠭᠡᠢ ᠤᠤ᠂ ᠦᠵᠡᠵᠦ ᠪᠠᠢ︾ ᠭᠡᠵᠦ ᠡᠵᠢ ᠪᠢᠲᠡᠨ ᠢ ᠪᠠᠨ ᠠᠷᠭᠠᠳᠠᠳᠠᠭ᠃ ᠪᠢᠳᠡ ᠬᠤᠪᠢ ᠬᠤᠪᠢᠨ ᠤ ᠬᠤᠪᠴᠠᠰᠤ ᠱᠠᠬᠠᠢ ᠪᠠᠨ ᠡᠮᠡᠭᠡ | ᠶᠢᠨ ᠪᠣᠰᠤᠭᠠ ᠬᠤᠷᠭᠤ ᠳᠤ ᠡᠪᠲᠡᠢ ᠡᠪᠬᠡᠵᠦ ᠬᠤᠷᠢᠶᠠᠭᠠᠳ ᠬᠡᠵᠢᠶᠡ ᠴᠤ ᠰᠢᠨᠡᠯᠡᠬᠦ ᠪᠢᠯᠡ ᠳ᠋ᠡ᠂ ᠰᠢᠨᠡ ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨᠡ ᠰᠢᠦ ᠭᠡᠵᠦ ᠶᠠᠭᠠᠷᠠᠬᠤ ᠳᠤ | ᠡᠨᠡ ᠰᠢᠨᠡ ᠵᠢᠯ ᠴᠠᠭᠠᠨ ᠰᠠᠷᠠ ᠨᠢ ᠴᠠᠭᠠᠨᠠ ᠪᠠᠨ ᠨᠢᠭᠡᠯᠡ ᠰᠢᠪᠠᠷᠳᠠᠴᠢᠬᠠᠭᠰᠠᠨ ᠶᠤᠮᠰᠢᠭ ᠭᠦᠷᠦᠭᠡᠳ ᠢᠷᠡᠬᠦ ᠦᠭᠡᠢ ᠨᠢ ᠬᠡᠴᠡᠭᠦᠦ ᠶᠤᠮ᠃ | ᠰᠢᠨᠡᠯᠡᠬᠦ ᠭᠡᠭᠴᠢ ᠶᠢᠨ ᠰᠠᠶᠢᠬᠠᠨ ᠨᠢ ᠰᠢᠨᠡ ᠬᠤᠪᠴᠠᠰᠤ ᠡᠮᠦᠰᠴᠦ ᠠᠮᠲᠠᠲᠠᠨ ᠢ ᠢᠳᠡᠬᠦ ᠶᠢᠨ ᠲᠥᠯᠥᠭᠡ ᠯᠡ ᠪᠤᠰᠤ᠃ ᠲᠡᠷᠡ ᠦᠶᠡᠰ ᠠᠶᠢᠯ ᠤᠯᠠᠨ ᠢᠶᠠᠷ | ᠢᠶᠠᠨ ᠴᠤᠭᠯᠠᠷᠠᠨ ᠠᠮᠤᠷ ᠮᠡᠨᠳᠤ ᠪᠠᠨ ᠡᠷᠢᠯᠴᠡᠨ᠂ ᠨᠢᠭᠡᠨ ᠨᠢᠭᠡᠨ ᠤ ᠳᠡᠭᠡᠨ ᠠᠶᠢᠯᠴᠢᠯᠠᠨ ᠴᠠᠢ ᠤᠤᠭᠤᠵᠤ ᠪᠤᠳᠠᠭᠠ ᠢᠳᠡᠳᠡᠭ᠃ ᠮᠢᠨᠤ ᠡᠪᠦᠭᠡ ᠡᠮᠡᠭᠡ ᠠᠶᠢᠯ ᠠᠶᠢᠮᠠᠭ | ᠲᠠᠭᠠᠨ ᠨᠠᠰᠤ ᠪᠠᠷ ᠬᠠᠮᠤᠭ ᠥᠨᠳᠥᠷ ᠪᠣᠯᠬᠤᠷ ᠰᠢᠨᠡ ᠶᠢᠨ ᠨᠢᠭᠡᠨ ᠤ ᠲᠦᠷᠦᠭᠦᠦ ᠲᠠᠬᠢᠶᠠᠨ ᠲᠠᠭᠤᠨ ᠢᠶᠠᠷ ᠪᠢᠳᠡ ᠬᠡᠳᠦᠭᠦᠯᠡ ᠶᠠᠭᠠᠷᠠᠨ ᠪᠣᠰᠴᠠᠭᠠᠵᠤ᠂ ᠡᠪᠦᠭᠡ ᠡᠮᠡᠭᠡ | ᠪᠠᠨ ᠰᠢᠷᠡᠭᠡᠨ ᠳᠡᠭᠡᠲᠡᠢ ᠵᠠᠯᠠᠵᠤ ᠰᠠᠭᠤᠯᠭᠠᠨ ᠠᠷᠢᠬᠢ ᠭᠡᠮᠨᠡᠨ ᠭᠠᠵᠠᠷ ᠲᠤ ᠰᠥᠭᠦᠳᠥᠨ ᠮᠥᠷᠭᠦᠭᠡᠳ ᠳᠥᠩᠭᠡᠵᠢ ᠪᠣᠰᠲᠠᠯᠠ ᠵᠡᠭᠦᠨ ᠪᠠᠷᠠᠭᠤᠨ ᠭᠡᠷ ᠤᠨ ᠬᠢᠨ | ᠠᠶᠢᠯᠴᠢᠯᠠᠬᠤ ᠪᠠᠷ ᠢᠷᠡᠵᠡᠭᠡᠵᠦ᠂ ᠡᠪᠦᠭᠡ ᠡᠮᠡᠭᠡ ᠳᠤ ᠠᠷᠢᠬᠢ ᠨᠡᠷᠡᠵᠦ︽ᠰᠠᠶᠢᠨᠠᠤ᠂ ᠰᠠᠶᠢᠨᠠᠤ︾ᠭᠡᠵᠦ ᠡᠪᠦᠳᠦᠭ ᠨᠤᠭᠤᠯᠤᠨ ᠰᠥᠭᠦᠳᠬᠦ ᠳᠤ ᠡᠬᠡᠨᠡᠷ ᠬᠡᠦᠬᠡᠳ ᠨᠢ ᠴᠤ | ᠳᠠᠭᠠᠯᠳᠤᠨ ᠬᠤᠶᠠᠷ ᠵᠠᠩ ᠭᠡᠷ ᠤᠨ ᠬᠥᠰᠡᠷ ᠳᠦᠭᠦᠷᠡᠩ ᠰᠦᠭᠦᠳᠴᠡᠭᠡᠨ᠂ ᠭᠠᠳᠠᠭᠠ ᠲᠠᠰᠤᠯᠭᠠᠨ ᠤ ᠡᠭᠦᠳᠡ ᠭᠠᠷᠳᠠᠯᠠ ᠦᠷᠭᠦᠯᠵᠢᠯᠡᠳᠡᠭ ᠪᠠᠶᠢᠯᠠ᠃ ᠥᠨᠳᠥᠷ | ᠨᠠᠰᠤᠲᠠᠨ ᠠᠴᠠ ᠢᠷᠦᠭᠡᠯ ᠠᠪᠬᠤ ᠨᠢ ᠥᠭᠡᠳᠡ ᠡᠰᠡᠷᠡᠭ ᠤᠨ ᠪᠡᠯᠭᠡᠳᠡᠯ ᠭᠡᠵᠦ ᠤᠷᠢᠳ ᠢᠶᠠᠷ ᠢᠷᠡᠭᠰᠡᠨ ᠢ ᠨᠢ ᠦᠳᠡᠵᠦ ᠠᠮᠵᠢᠬᠤ ᠠᠴᠠ ᠡᠮᠦᠨᠡ ᠤᠷᠢᠳᠤ | ᠬᠤᠶᠢᠲᠤ ᠠᠶᠢᠯ ᠤᠨ ᠭᠡᠶᠢᠴᠢᠨ ᠴᠤ ᠵᠠᠯᠭᠠᠭᠠ ᠪᠠᠷ ᠴᠤᠪᠤᠷᠠᠨ ᠡᠪᠦᠭᠡ ᠡᠮᠡᠭᠡ ᠬᠤᠶᠠᠭᠤᠯᠠ ᠦᠳᠡ ᠬᠠᠵᠠᠶᠢᠲᠠᠯᠠ ᠬᠤᠯᠠ ᠣᠶᠢᠷᠠ ᠶᠢᠨ ᠭᠡᠶᠢᠴᠢᠨ ᠵᠣᠴᠢᠨ ᠳᠤ | ᠢᠷᠦᠭᠡᠯ ᠬᠠᠶᠢᠷᠠᠯᠠᠭᠠᠳ ᠲᠠᠭᠠᠷᠠᠴᠢᠬᠠᠳᠠᠬ᠃ ᠡᠵᠢ ᠢᠷᠡᠭᠰᠡᠨ ᠭᠡᠶᠢᠴᠢᠨ ᠳᠤ ᠴᠠᠢ ᠤᠰᠤ ᠠᠶᠠᠭᠠᠯᠠᠬᠤ ᠵᠠᠭᠤᠷᠠ ᠮᠠᠨ ᠤ ᠬᠡᠳᠦᠭᠦᠯᠡ ᠠᠪᠤ ᠶᠢ ᠲᠠᠭᠠᠵᠤ ᠵᠡᠭᠦᠨ ᠭᠡᠷ ᠤᠨ | ᠬᠤᠶᠠᠳᠤᠭᠠᠷ ᠡᠪᠦᠭᠡ ᠡᠮᠡᠭᠡ ᠳᠤ ᠵᠣᠯᠭᠠᠬᠤ ᠪᠠᠷ ᠣᠷᠣᠵᠤ︽ᠰᠠᠶᠢᠨᠠᠤ︾ ᠭᠡᠵᠦ ᠡᠪᠦᠳᠦᠭ ᠨᠤᠭᠤᠯᠤᠨ ᠠᠮᠤᠷ ᠠᠰᠠᠭᠤᠵᠤ ᠰᠢᠨᠡ ᠶᠢᠨ ᠢᠷᠦᠭᠡᠯ ᠢ ᠨᠢ ᠭᠦᠷᠳᠡᠨ᠂ ᠰᠢᠷᠠ | ᠲᠣᠰᠣ᠂ ᠬᠠᠭᠤᠷᠠᠢ ᠪᠤᠳᠠᠭᠠ᠂ ᠬᠤᠷᠤᠳ ᠢ ᠨᠢ ᠢᠳᠡᠵᠦ᠂ ᠲᠠᠷᠠᠭᠠᠴᠢ ᠶᠢᠨ ᠭᠡᠷ ᠲᠤ ᠲᠠᠭᠢᠭᠠᠳ ᠲᠠᠪᠤᠭᠤᠯᠠ ᠵᠠᠬᠠ ᠳᠠᠷᠠᠭᠠᠯᠠᠨ ᠰᠢᠨᠡ ᠶᠢᠨ ᠵᠣᠯᠭᠠᠯᠲᠠ ᠬᠢᠵᠦ | ᠣᠷᠣᠭᠰᠠᠨ ᠭᠡᠷ ᠪᠣᠯᠭᠠᠨ ᠳᠤ ᠬᠠᠭᠤᠷᠠᠢ ᠪᠤᠳᠠᠭᠠ᠂ ᠬᠤᠷᠤᠳ ᠡᠨᠡ ᠲᠡᠷᠡ ᠭᠡᠵᠦ ᠢᠳᠡᠭᠰᠡᠭᠡᠷ ᠪᠠᠶᠢᠭᠠᠳ ᠠᠷᠪᠠᠭᠠᠳ ᠭᠡᠷ ᠲᠤ ᠠᠶᠢᠯᠴᠢᠯᠠᠭᠠᠳ ᠪᠠᠷᠠᠲᠠᠯᠠ | ᠬᠤᠳᠣᠭᠤᠳᠤ ᠭᠡᠳᠡᠰᠦ ᠪᠠᠨ ᠵᠡᠬᠡᠲᠡᠯᠡ ᠠᠬᠰᠠᠶᠢᠯᠭᠠᠵᠤ ᠠᠪᠤᠭᠠᠳ ᠠᠬᠢᠭᠠᠳ ᠬᠡᠳᠦᠨ ᠡᠳᠦᠷ ᠬᠠᠭᠤᠷᠠᠢ ᠪᠤᠳᠠᠭᠠ ᠶᠢ ᠪᠤᠳᠤᠬᠤ ᠠᠴᠠ ᠵᠣᠷᠢᠭ ᠠᠯᠳᠠᠷᠠᠳᠠᠭ ᠰᠠᠨ᠃ | ᠡᠳᠦᠷ ᠬᠤᠨᠤᠭ ᠭᠡᠵᠦ ᠬᠦᠰᠡᠵᠦ ᠪᠠᠷᠠᠯᠠᠬᠤ ᠳᠤ ᠤᠳᠠᠭᠠᠨ ᠪᠠᠶᠢᠲᠠᠯᠠ ᠭᠦᠷᠦᠭᠡᠳ ᠢᠷᠡᠪᠡᠯ ᠬᠤᠷᠳᠤᠨ ᠨᠢ ᠠᠷᠭᠠ ᠦᠭᠡᠢ ᠶᠤᠮᠳᠠᠬ᠃ ᠪᠤᠯᠳᠠᠬ ᠰᠠᠨ ᠪᠣᠯ | ᠪᠢᠲᠡᠭᠦᠨ ᠰᠢᠨᠡ ᠶᠢᠨ ᠨᠢᠭᠡᠨ ᠤ ᠨᠠᠷᠠ ᠶᠢ ᠲᠤᠯᠵᠤ ᠲᠠᠯᠪᠢᠭᠠᠳ ᠡᠶᠢᠮᠦ ᠰᠠᠶᠢᠬᠠᠨ ᠡᠳᠦᠷ ᠢ ᠢᠯᠡᠭᠦᠦ ᠵᠢᠭᠠᠬᠠᠨ ᠤᠷᠲᠤᠳᠬᠠᠬᠤ ᠰᠠᠨᠠᠭᠠ ᠴᠤ ᠣᠷᠣᠳᠠᠭ ᠪᠢᠯᠡ᠃ | ᠲᠡᠷᠡ ᠦᠶᠡᠰ ᠬᠡᠨ ᠤ ᠭᠡᠵᠢᠭᠡᠨ ᠳᠡᠭᠡᠨ ᠶᠠᠮᠠᠷ ᠥᠩᠭᠡ ᠶᠢᠨ ᠣᠷᠢᠶᠠᠯᠲᠠ ᠵᠡᠭᠦᠭᠰᠡᠨ᠂ ᠬᠡᠨ ᠤ ᠭᠡᠷ ᠤᠨ ᠬᠠᠨᠠ ᠳᠠᠭᠠᠨ ᠶᠠᠮᠠᠷ ᠵᠢᠷᠤᠭ ᠲᠠᠢ ᠴᠠᠭᠠᠰᠤᠨ ᠬᠤᠸᠠᠷ | ᠨᠠᠭᠠᠭᠰᠠᠨ᠂ ᠬᠡᠨ ᠨᠢ ᠶᠠᠮᠠᠷ ᠬᠤᠪᠴᠠᠰᠤ ᠡᠮᠦᠰᠦᠭᠰᠡᠨ᠂ ᠬᠡᠨ ᠤ ᠱᠠᠬᠠᠢ ᠨᠢ ᠨᠡᠩ ᠵᠣᠬᠢᠷᠠᠭᠰᠠᠨ᠂ ᠬᠡᠨ ᠤ ᠭᠡᠷ ᠲᠤᠨᠢ ᠶᠠᠮᠠᠷ ᠵᠣᠴᠢᠨ ᠢᠷᠡᠭᠰᠡᠨ ᠭᠡᠬᠦ ᠮᠡᠲᠦ ᠪᠠᠷ | ᠬᠡᠦᠬᠡᠨᠴᠦᠦᠯ ᠬᠦᠦᠴᠦᠦᠯ ᠬᠡᠳᠦᠨ ᠪᠦᠯᠦᠭ ᠪᠣᠯᠵᠤ ᠱᠤᠤᠭᠢᠯᠳᠤᠵᠠᠭᠠᠬᠤ ᠪᠥᠭᠡᠳ ᠮᠠᠨ ᠤ ᠡᠭᠡᠴᠢ ᠳᠡᠭᠦᠦ ᠬᠡᠳᠦᠭᠦᠯᠡ ᠶᠢᠨ ᠡᠮᠦᠰᠬᠡᠯ ᠵᠡᠭᠦᠰᠬᠡᠯ ᠪᠠᠷᠤᠭ ᠤᠳᠠᠭᠠ | ᠪᠣᠯᠭᠠᠨ ᠦᠶᠡ ᠬᠤᠷᠠᠭᠴᠤᠤᠯ ᠤᠨ ᠢᠶᠠᠨ ᠥᠨᠳᠥᠷ ᠦᠨᠡᠯᠡᠯᠲᠡ ᠶᠢ ᠣᠯᠳᠠᠭ ᠪᠠᠶᠢᠵᠠᠢ᠃ ᠤᠴᠢᠷ ᠨᠢ ᠮᠢᠨᠤ ᠡᠮᠡᠭᠡ ᠪᠣᠯᠣᠨ ᠡᠵᠢ ᠪᠦᠷ ᠠᠶᠢᠯ ᠳᠠᠭᠠᠨ ᠨᠠᠷᠠᠲᠠᠢ ᠤᠷᠠᠨ | ᠣᠶᠣᠳᠠᠯᠴᠢᠨ ᠶᠤᠮ ᠴᠢᠨᠢ᠃ ᠪᠢᠳᠡ ᠪᠠᠰᠠ ᠦᠶᠡ ᠬᠤᠷᠠᠭᠴᠤᠤᠯ ᠴᠤᠭᠯᠠᠨ ᠫᠤᠤᠵᠢᠩ ᠲᠠᠯᠪᠢᠬᠤ᠂ ᠬᠥᠵᠥᠷ ᠲᠣᠭᠯᠠᠬᠤ᠂ ᠮᠥᠰᠥᠨ ᠳᠤ ᠭᠤᠯᠭᠤᠬᠤ᠂ ᠡᠯᠢᠶᠡ ᠲᠠᠭᠢᠶᠠ | ᠬᠥᠭᠡᠭᠡᠯᠴᠡᠬᠦ᠂ ᠨᠢᠭᠤᠯᠴᠠᠭᠠ ᠨᠠᠭᠠᠳᠬᠤ ᠭᠡᠵᠦ ᠡᠳᠦᠷ ᠤᠨ ᠵᠣᠷᠢᠭ ᠢᠶᠠᠷ ᠭᠡᠷ ᠤᠨ ᠪᠠᠷᠠ ᠦᠵᠡᠳᠡᠭ ᠦᠭᠡᠢ ᠪᠥᠭᠡᠳ ᠣᠷᠣᠢ ᠪᠤᠯᠬᠤ ᠳᠤ ᠠᠶᠢᠯ ᠤᠨ ᠠᠪᠤ᠂ ᠠᠪᠠᠭᠠ | ᠨᠠᠷ ᠤᠨ ᠬᠥᠵᠥᠷ ᠨᠠᠭᠠᠳᠬᠤ ᠶᠢ ᠬᠠᠵᠠᠭᠤ ᠳᠤᠨᠢ ᠦᠵᠡᠵᠦ ᠰᠠᠭᠤᠭᠰᠠᠭᠠᠷ ᠪᠠᠶᠢᠵᠤ ᠬᠡᠵᠢᠶᠡ ᠨᠣᠶᠢᠷ ᠭᠦᠷᠦᠭᠡᠳ ᠲᠡᠰᠬᠦ ᠠᠯᠲᠠᠷᠬᠠᠤ ᠳᠠᠭᠠᠨ ᠣᠩᠬᠤᠯᠢᠵᠤ ᠤᠨᠠᠭᠰᠠᠨ | ᠣᠷᠣᠨ ᠳᠠᠭᠠᠨ ᠮᠠᠩᠰᠢᠭᠤᠷᠠᠨ ᠤᠨᠲᠠᠭᠠᠳ ᠮᠠᠷᠭᠠᠰᠢ ᠶᠢᠨ ᠨᠠᠷᠠᠨ ᠢ ᠤᠭᠲᠤᠳᠠᠭ ᠪᠢᠯᠡ᠃ | ᠵᠢᠯ ᠳᠡᠭᠡᠨ ᠣᠨ ᠳᠠᠭᠠᠨ ᠳᠤᠷᠠᠯᠠᠭᠠᠳ ᠢᠷᠡᠭᠰᠡᠨ ᠠᠮᠲᠠᠲᠤ ᠢᠳᠡᠭᠡᠨ ᠢ ᠢᠳᠡᠵᠦ᠂ ᠵᠢᠷᠦᠬᠡᠨ ᠭᠤᠣᠯ ᠠᠴᠠ ᠪᠠᠨ ᠬᠢᠮᠠᠭᠠᠳᠠᠨ ᠬᠠᠳᠠᠭᠠᠯᠠᠭᠰᠠᠨ ᠰᠢᠨᠡ | ᠬᠤᠪᠴᠠᠰᠤ ᠪᠠᠨ ᠡᠮᠦᠰᠦᠨ᠂ ᠣᠷᠣᠭᠰᠠᠨ ᠭᠡᠷ ᠪᠣᠯᠭᠠᠨ ᠠᠴᠠ ᠬᠡᠳᠦᠨ ᠬᠡᠰᠡᠭ ᠰᠢᠬᠢᠷ᠂ ᠬᠤᠶᠠᠷ ᠠᠳᠬᠤ ᠬᠠᠭᠤᠷᠤᠭᠰᠠᠨ ᠨᠠᠷᠠᠨ ᠬᠤᠸᠠᠷ ᠤᠨ ᠦᠷᠡ ᠪᠤᠶᠤ | ᠯᠣᠬᠠᠱᠧᠩ ᠡᠨᠡ ᠲᠡᠷᠡ ᠣᠯᠣᠭᠠᠳ ᠢᠳᠡᠴᠢᠬᠡᠬᠦ ᠪᠠᠷ ᠡᠨᠡ ︽ᠶᠢᠷᠲᠢᠨᠴᠦ ᠶᠢᠨ ᠵᠢᠷᠭᠠᠯ︾ ᠭᠡᠭᠴᠢ ᠨᠢ ᠪᠤᠳᠠ ᠪᠡᠶᠡ ᠪᠠᠷ ᠢᠶᠠᠨ ᠮᠢᠨᠤᠬᠢ ᠪᠣᠯᠵᠤ᠂ ᠬᠤᠶᠠᠷ ᠭᠤᠷᠪᠠᠨ | ᠡᠳᠦᠷ ᠴᠢᠨᠢ ᠬᠤᠷᠤᠭᠤ ᠢᠨᠴᠢᠳᠬᠦ ᠶᠢᠨ ᠬᠤᠭᠤᠷᠣᠨᠳᠤ ᠥᠩᠭᠡᠷᠡᠭᠡᠳ ᠥᠭᠬᠦ ᠨᠢ ᠲᠡᠷᠡ᠃ ᠮᠠᠨᠠᠶᠢᠬᠢᠨ ᠤ ᠳᠤ ᠰᠢᠨᠡ ᠶᠢᠨ ᠲᠦᠷᠪᠡᠨ ᠠᠴᠠ ᠡᠬᠢᠯᠡᠨ ᠬᠤᠯᠠ ᠶᠢᠨ | ᠵᠣᠴᠢᠨ ᠡᠯᠵᠢᠭᠡᠨ ᠲᠡᠷᠭᠡ ᠪᠤᠶᠤ ᠤᠨᠤᠭᠠ ᠭᠦᠯᠦᠭ ᠲᠠᠢ ᠬᠤᠨᠣᠭᠤᠲᠠ ᠥᠨᠵᠢᠭᠦᠲᠡ ᠪᠠᠷ ᠢᠷᠡᠵᠡᠭᠡᠳᠡᠭ᠃ ᠡᠵᠢ ᠭᠡᠷ ᠲᠤ ᠵᠣᠴᠢᠨ ᠳᠤ ᠪᠤᠳᠠᠭᠠ ᠵᠠᠭᠤᠰᠢ | ᠪᠡᠯᠡᠳᠦᠭᠡᠳ ᠶᠠᠭᠠᠷᠠᠬᠤ ᠳᠤ ᠪᠢᠳᠡ ᠴᠤ ᠡᠯᠵᠢᠭᠡ ᠮᠣᠷᠢ ᠶᠢ ᠨᠢ ᠡᠪᠡᠰᠦᠯᠡᠨᠡ ᠤᠰᠤᠯᠠᠨᠠ ᠭᠡᠵᠦ ᠭᠠᠳᠠᠭᠠ ᠳᠡᠪᠵᠢᠶᠡᠷᠡᠨ ᠭᠠᠷ ᠬᠥᠯ ᠪᠡᠭᠡᠷᠡᠵᠦ ᠪᠠᠶᠢᠪᠠᠴᠤ ᠪᠠᠶᠠᠷ | ᠲᠠᠢ ᠨᠢ ᠠᠷᠭᠠ ᠦᠭᠡᠢ ᠭᠦᠶᠦᠯᠳᠦᠨᠡ᠃ ᠪᠢᠳᠡ ᠶᠡᠷᠦᠳᠡᠭᠡᠨ ᠰᠢᠨᠡ ᠶᠢᠨ ᠬᠡᠳᠦᠨ ᠳᠤ ᠵᠣᠴᠢᠨ ᠳᠠᠶᠢᠯᠠᠵᠤ᠂ ᠠᠷᠪᠠᠳ ᠪᠣᠯᠵᠤ ᠵᠣᠴᠢᠨ ᠭᠡᠶᠢᠴᠢᠨ ᠴᠥᠭᠡᠷᠡᠭᠰᠡᠨ ᠤ | ᠲᠠᠷᠠᠭᠠ ᠰᠠᠶ᠋ᠢ ᠠᠪᠤ ᠡᠵᠢ ᠪᠢᠳᠡ ᠡᠭᠡᠴᠢ ᠳᠡᠭᠦᠦ ᠲᠠᠪᠤᠭᠤᠯᠠ ᠶᠢ ᠬᠤᠶᠠᠷ ᠵᠠᠮ ᠬᠤᠪᠢᠶᠠᠨ᠂ ᠥᠭᠡᠳᠡᠰᠦ ᠪᠠᠷ ᠵᠦᠢᠵᠦ ᠣᠶᠣᠭᠰᠠᠨ ᠪᠥᠰ ᠪᠣᠭᠴᠣᠨ ᠳᠠᠭᠠᠨ ᠯᠣᠩᠬᠤ | ᠲᠠᠢ ᠰᠤᠯᠠ ᠠᠷᠢᠬᠢ᠂ ᠠᠷᠵᠠᠭᠠᠷ ᠴᠠᠭᠠᠰᠤᠨ ᠪᠠᠭᠯᠠᠭᠠ ᠲᠠᠢ ᠳᠥᠷᠪᠡᠯᠵᠢᠨ ᠪᠣᠣᠪᠤ ᠰᠠᠪᠠᠯᠠᠵᠤ ᠳᠡᠭᠦᠵᠢᠯᠡᠭᠦᠯᠦᠨ ᠶᠠᠩᠰᠢᠪ ᠤᠨ ᠠᠶᠢᠯ ᠤᠨ ᠮᠦᠳᠠᠨ ᠡᠮᠡᠭᠡ ᠶᠢᠨ ᠳᠤ | ᠶᠠᠪᠤᠭᠤᠯᠬᠤ ᠪᠤᠶᠤ ᠳ᠋ᠦᠡᠭᠰᠢᠭᠤᠷ ᠪᠠᠷᠢᠭᠠᠳᠠ ᠶᠢᠨ ᠥᠷᠥᠮᠡ ᠨᠠᠭᠠᠴᠤ ᠠᠪᠤ ᠶᠢᠨ ᠳᠤ ᠠᠶᠢᠯᠴᠢᠯᠠᠭᠤᠯᠬᠤ ᠳᠤᠨᠢ ᠭᠤᠴᠢᠨ ᠭᠠᠵᠠᠷ ᠤᠨ ᠵᠠᠮ ᠢ ᠭᠦᠶᠦᠭᠡ ᠪᠠᠷ | ᠶᠠᠪᠤᠬᠤ ᠳᠠᠭᠠᠨ ᠪᠢᠳᠡ ᠰᠤᠷᠤᠬᠰᠠᠨ ᠮᠡᠳᠡᠭᠰᠡᠨ ᠬᠡᠳᠦᠨ ᠳᠠᠭᠤᠤ ᠪᠠᠨ ᠰᠣᠯᠣᠭᠠᠢ ᠬᠠᠵᠠᠭᠠᠢ ᠠᠶᠠᠯᠠᠭᠤᠯᠵᠤ᠂ ᠭᠦᠷ ᠬᠥᠭᠵᠢᠶᠡᠨ ᠲᠠᠢ ᠴᠠᠭᠠᠨ ᠰᠠᠷᠠ ᠶᠢᠨ ᠪᠠᠶᠠᠷ ᠢᠶᠠᠨ | ᠬᠥᠳᠡᠭᠡ ᠬᠡᠭᠡᠷᠡ ᠶᠢᠨ ᠬᠥᠷᠥᠰᠥ ᠰᠢᠷᠣᠢ᠂ ᠬᠥᠲᠥᠯ ᠳᠣᠪᠣᠴᠠᠭ᠂ ᠬᠥᠨᠳᠡᠢ ᠵᠢᠯᠠᠭᠠ ᠲᠠᠢ ᠪᠠᠨ ᠬᠤᠪᠢᠶᠠᠯᠴᠠᠳᠠᠭ ᠪᠠᠶᠢᠭᠰᠠᠨ᠃ ᠵᠠ ᠢᠩᠭᠢᠵᠦ ᠬᠦᠰᠡᠵᠦ ᠬᠦᠯᠢᠶᠡᠵᠦ | ᠪᠠᠶᠢᠭᠰᠠᠨ ᠰᠢᠨᠡ ᠵᠢᠯ ᠴᠠᠭᠠᠨ ᠰᠠᠷᠠ ᠶᠢᠨ ᠠᠷᠪᠠᠨ ᠲᠠᠪᠤᠨ ᠭᠦᠷᠦᠭᠡᠳ ᠥᠨᠳᠥᠷᠯᠡᠬᠦ ᠳᠥᠬᠦᠬᠦ ᠳᠤ ᠶᠠᠮᠠᠷ ᠶᠠᠭᠤᠮᠠ ᠪᠠᠨ ᠭᠡᠭᠡᠴᠢᠭᠡᠭᠰᠡᠨ ᠰᠢᠭ ᠳᠣᠲᠣᠷᠠ ᠨᠢᠭᠡᠯᠡ | ᠬᠤᠭᠤᠰᠤᠷᠠᠵᠤ ᠣᠴᠢᠬᠤ ᠪᠤᠯᠪᠠᠴᠤ᠂ ᠤᠳᠠᠯ ᠦᠭᠡᠢ ᠰᠤᠷᠭᠠᠭᠤᠯᠢ ᠡᠬᠢᠯᠡᠬᠦ ᠵᠢᠴᠢ ᠠᠶᠢᠯ ᠠᠶᠢᠮᠠᠭ ᠤᠨ ᠬᠢᠨ ᠬᠠᠪᠤᠷ ᠤᠨ ᠲᠠᠷᠢᠶᠠᠯᠠᠭᠠ ᠶᠢᠨ ᠪᠡᠯᠡᠳᠬᠡᠯ ᠠᠵᠢᠯ ᠢᠶᠠᠨ | ᠭᠠᠷᠳᠠᠳᠠᠬ ᠪᠣᠯᠬᠤᠷ ᠠᠮᠢᠳᠤᠷᠠᠯ ᠰᠤᠷᠤᠯᠭᠠ ᠮᠥᠨ ᠯᠡ ᠤᠤᠯ ᠬᠡᠪ ᠲᠡᠭᠡᠨ ᠣᠷᠣᠬᠤ ᠪᠠᠷ ᠪᠡᠯᠡᠬᠡᠨ ᠪᠣᠯᠵᠤ᠂ ᠠᠯᠢ ᠪᠦᠬᠦᠢ ᠬᠦᠰᠡᠯ ᠬᠦᠯᠢᠶᠡᠯᠲᠡ ᠪᠠᠨ ᠲᠠᠷᠠᠭᠠᠴᠢ | ᠶᠢᠨ ᠴᠠᠭᠠᠨ ᠰᠠᠷᠠ ᠳᠠᠭᠠᠨ ᠨᠠᠶᠢᠳᠠᠳᠠᠭ ᠪᠢᠯᠡ᠃ | ᠨᠢᠭᠡ ᠨᠢᠭᠡ ᠴᠠᠭᠠᠨ ᠰᠠᠷᠠ ᠢᠩᠭᠢᠵᠦ ᠬᠦᠰᠡᠯ ᠬᠦᠯᠢᠶᠡᠯᠲᠡ ᠪᠠ ᠪᠠᠶᠠᠷ ᠳᠣᠭᠳᠣᠯᠤᠯ ᠤᠨ ᠳᠤᠮᠳᠠ ᠢᠷᠡᠵᠤ ᠪᠤᠴᠠᠬᠤ ᠳᠤ ᠣᠨ ᠰᠠᠷᠠ ᠣᠷᠴᠢᠵᠤ ᠨᠠᠰᠤ ᠵᠢᠯ | ᠴᠤ ᠨᠡᠮᠡᠭᠳᠡᠭᠡᠳ ᠤᠳᠤ ᠨᠡᠩ ᠴᠤ ᠡᠳᠦᠷ ᠪᠣᠯᠭᠠᠨ ᠰᠢᠨᠡᠯᠡᠵᠦ ᠴᠠᠭᠠᠯᠠᠵᠤ᠂ ᠪᠤᠳᠤᠵᠤ ᠰᠡᠳᠬᠢᠭᠰᠡᠨ ᠠᠴᠠ ᠪᠠᠷᠠ ᠦᠭᠡᠢ ᠳᠡᠭᠡᠭᠦᠷ ᠠᠮᠢᠳᠤᠷᠠᠯ ᠢ ᠡᠳ᠋ᠯᠡᠬᠦ ᠪᠣᠯᠤᠭᠰᠠᠨ | ᠢᠶᠠᠷ ᠬᠥᠮᠥᠰ ᠤᠨ ᠰᠢᠨᠡᠯᠡᠬᠦ ᠲᠤᠬᠠᠢ ᠣᠶᠢᠯᠠᠭᠠᠯᠲᠠ ᠲᠥᠷᠥᠭᠳᠡᠯ ᠴᠤ ᠤᠯᠠᠮ ᠢᠶᠠᠷ ᠨᠢᠮᠭᠡᠷᠡᠵᠦ᠂ ᠨᠡᠩ ᠴᠤ ᠬᠤᠳᠠ ᠭᠠᠵᠠᠷ ᠡᠭᠦᠳᠡ ᠬᠠᠭᠠᠯᠭᠠ ᠪᠠᠨ ᠲᠠᠬ | ᠲᠦᠭᠵᠢᠭᠡᠳ ᠣᠷᠣᠵᠤ ᠭᠠᠷᠬᠤ ᠬᠥᠮᠥᠨ ᠴᠤ ᠴᠥᠭᠡᠷᠡᠪᠡ᠃ ᠴᠠᠭ ᠬᠥᠭᠵᠢᠵᠦ ᠨᠡᠶᠢᠭᠡᠮ ᠤᠷᠤᠭᠰᠢᠯᠠᠵᠤ ᠠᠮᠢᠳᠤᠷᠠᠯ ᠰᠠᠶᠢᠵᠢᠷᠠᠨ᠂ ᠠᠯᠠᠭᠠᠨ ᠳᠡᠭᠡᠷᠡᠬᠢ ᠭᠠᠷ ᠤᠲᠠᠰᠤ | ᠪᠠᠷ ᠢᠶᠠᠨ ᠠᠯᠢ ᠪᠦᠬᠦᠢ ᠶᠢ ᠪᠡᠶᠡᠯᠡᠭᠦᠯᠬᠦ ᠪᠣᠯᠤᠭᠰᠠᠨ ᠶᠤᠮ ᠴᠢᠨᠢ ᠶᠠᠭᠠᠬᠢᠨᠠ ᠳ᠋ᠠ᠃ ᠭᠡᠪᠡᠴᠦ ᠪᠠᠭᠠ ᠶᠢᠨ ᠦᠶᠡ ᠶᠢᠨ ᠲᠡᠶᠢᠮᠦᠷᠬᠦᠦ ᠴᠠᠭᠠᠨ ᠰᠠᠷᠠ ᠶᠢᠨ ᠡᠶᠡᠯᠰᠡᠭ | ᠳᠣᠲᠣᠨᠣ ᠠᠭᠤᠷ ᠠᠮᠢᠰᠬᠤᠯ᠂ ᠡᠯᠢᠭᠡᠨ ᠰᠠᠳᠤᠨ ᠤ ᠬᠠᠶᠢᠷᠠ᠂ ᠦᠶᠡ ᠶᠢᠨ ᠨᠥᠬᠦᠳ ᠤᠨ ᠳᠠᠰᠤᠯᠴᠠᠯ᠂ ᠠᠶᠢᠯ ᠤᠯᠠᠨ ᠤ ᠶᠠᠪᠤᠯᠴᠠᠭᠠ᠂ ᠭᠦᠨ ᠵᠤᠵᠠᠭᠠᠨ ᠪᠥᠭᠡᠳ ᠬᠡᠨ | ᠠᠯᠢᠨ ᠢ ᠴᠤ ᠨᠥᠯᠥᠭᠡᠯᠡᠵᠦ ᠪᠠᠶᠠᠷᠯᠠᠭᠤᠯᠳᠠᠭ ᠨᠤᠲᠤᠭ ᠤᠰᠤᠨ ᠬᠥᠷᠰᠢ ᠰᠠᠭᠠᠬᠠᠯᠲᠠ ᠶᠢᠨ ᠴᠡᠪᠡᠷ ᠠᠷᠢᠭᠤᠨ ᠨᠠᠶᠢᠷ ᠰᠡᠳᠬᠢᠯᠭᠡ ᠪᠣᠯᠣᠨ ᠤᠯᠠᠮᠵᠢᠯᠠᠯᠲᠤ | ᠰᠣᠶᠣᠯ ᠤᠨ ᠦᠵᠡᠭᠳᠡᠯ ᠠᠬᠤᠢ ᠨᠢ ᠤᠭᠤᠷᠠᠭ ᠲᠠᠷᠢᠬᠢᠨ ᠳᠤ ᠬᠠᠳᠠᠩᠰᠢᠵᠤ᠂ ᠤᠯᠠᠭᠠᠨ ᠴᠢᠰᠤᠨ ᠳᠤ ᠯᠤᠭᠰᠢᠭᠠᠳ ᠬᠡᠵᠢᠶᠡᠳᠡ ᠶᠢᠨ ᠰᠠᠶᠢᠬᠠᠨ ᠳᠤᠷᠠᠳᠬᠠᠯ ᠪᠣᠯᠵᠤ᠂ | ᠪᠤᠯᠳᠠᠬ ᠰᠠᠨ ᠪᠣᠯ ᠪᠠᠭᠠ ᠨᠠᠰᠤᠨ ᠤ ᠴᠠᠭᠠᠨ ᠰᠠᠷᠠ ᠳᠠᠭᠠᠨ ᠪᠤᠴᠠᠵᠤ ᠬᠠᠷᠢᠬᠤ ᠶᠤᠮ ᠰᠠᠨ ᠭᠡᠵᠦ ᠨᠠᠳᠠᠳᠤ ᠪᠤᠳᠤᠬᠳᠠᠭᠠᠳ ᠯᠠ ᠪᠠᠶᠢᠨᠠ᠃ | | | |