| ᠮᠥᠩᠭᠦᠨ ᠴᠠᠭᠠᠨ ᠰᠠᠷᠠᠨ ᠤ ᠬᠠᠪᠢᠷᠭᠠᠯᠠᠵᠤ ᠲᠡᠷᠭᠡᠯᠰᠢᠬᠦ ᠶᠢᠨ ᠭᠡᠯᠪᠡᠷᠢ ᠮᠡᠲᠦ ᠵᠢᠷᠦᠬᠡ ᠮᠢᠨᠢ ᠬᠠᠭᠤᠴᠢᠨ ᠵᠢᠯ ᠢᠶᠠᠨ ᠦᠳᠡᠬᠦ ᠳᠡᠭᠡᠨ ᠤᠶᠠᠷᠠᠵᠤ | ᠬᠠᠩᠭᠠᠶᠢᠷᠠᠭᠠᠳ ᠰᠢᠨᠡ ᠣᠨ ᠢᠶᠠᠨ ᠤᠭᠲᠤᠬᠤ ᠳᠠᠭᠠᠨ ᠳᠣᠭᠳᠣᠯᠵᠤ ᠳᠦᠭᠦᠷᠳᠡᠭ ᠨᠢ ᠦᠨᠡᠨ ᠪᠠᠶᠢᠵᠠᠢ᠃ | ᠣᠨ ᠵᠢᠯ ᠭᠡᠵᠦ ᠤᠷᠤᠰᠬᠠᠯ ᠨᠢ ᠲᠠᠲᠠᠭᠤᠷᠠᠬᠤ ᠦᠭᠡᠢ ᠮᠥᠩᠬᠡ ᠶᠢᠨ ᠭᠤᠣᠯ ᠴᠦ ᠶᠤᠮ ᠤᠤ︖ ᠡᠰᠡᠬᠦᠯᠡ ᠢᠷᠡᠵᠦ ᠪᠤᠴᠠᠬᠤ ᠭᠡᠶᠢᠴᠢᠨ ᠴᠦ ᠶᠤᠮ ᠤᠤ︖ | ᠨᠢᠭᠡ ᠮᠡᠳᠡᠬᠦ ᠳᠤ 2024 ᠣᠨ ᠮᠢᠨᠢ ᠪᠢᠳᠡᠨ ᠳᠤ ᠦᠯᠢᠭᠡᠷ ᠲᠡᠦᠬᠡ᠂ ᠦᠨᠡᠨ ᠮᠥᠨ ᠢᠶᠠᠨ ᠦᠯᠡᠳᠡᠭᠡᠭᠡᠳ ᠠᠶᠠᠷᠯᠠᠨ ᠰᠠᠯᠬᠤ ᠳᠤ 2025 ᠣᠨ ᠮᠢᠨᠢ ᠤᠷᠢᠨ | ᠳᠤᠯᠠᠭᠠᠨ ᠬᠠᠪᠤᠷ ᠢᠶᠠᠨ ᠳᠠᠭᠠᠭᠤᠯᠤᠭᠠᠳ ᠡᠭᠦᠳᠡᠨ ᠪᠣᠱᠣᠭᠠᠨ ᠳᠡᠭᠡᠷᠡ ᠬᠠᠩᠬᠤᠯᠲᠠᠯᠠ ᠮᠦᠰᠢᠶᠡᠭᠰᠡᠭᠡᠷ ᠭᠦᠷᠦᠭᠡᠳ ᠢᠷᠡᠯᠡ᠃ ᠬᠥᠮᠥᠨ ᠵᠤᠨ ᠳᠠᠭᠠᠨ ᠵᠣᠪᠠᠵᠤ | ᠵᠢᠷᠭᠠᠬᠤ ᠶᠢᠨ ᠠᠮᠲᠠ ᠶᠢ ᠮᠡᠳᠡᠭᠦᠯᠳᠡᠭ ᠨᠢ ᠣᠨ ᠵᠢᠯ ᠲᠠ ᠪᠠᠶᠢᠭᠰᠠᠨ ᠠᠵᠤᠭᠤ︕ | ᠰᠢᠨᠡ ᠣᠨ ᠳᠤ ᠶᠠᠭᠤ ᠪᠦᠭᠦᠨ ᠰᠢᠨᠡ ᠪᠠᠷ ᠡᠬᠢᠯᠡᠨᠡ᠃ ᠬᠠᠬᠢᠷ ᠬᠦᠢᠲᠡᠨ ᠡᠪᠦᠯ ᠢ ᠨᠢᠴᠦᠭᠦᠨ ᠲᠤᠭᠤᠯᠤᠬᠰᠠᠨ ᠤᠢ ᠮᠣᠳᠣ ᠬᠥᠬᠡᠷᠡᠨ ᠨᠣᠭᠤᠭᠠᠷᠠᠬᠤ ᠳᠤ | ᠲᠤᠷᠤᠨᠠ ᠵᠦᠭ ᠲᠡᠮᠡᠦᠯᠵᠦ ᠵᠢᠳᠬᠦᠭᠰᠡᠨ ᠭᠤᠣᠯ ᠮᠥᠷᠡᠨ ᠮᠥᠰᠥ ᠪᠠᠨ ᠢᠰᠬᠦᠯᠵᠦ ᠡᠷᠬᠡ ᠴᠢᠯᠦᠭᠡᠲᠡᠢ ᠱᠤᠤᠭᠢᠭᠠᠳ ᠤᠷᠳᠤ ᠶᠢᠨ ᠳᠠᠭᠤᠤ ᠰᠢᠭ᠋ ᠤᠷᠮᠠ ᠶᠢ | ᠰᠡᠷᠭᠦᠭᠡᠵᠦ ᠵᠣᠷᠢᠭ ᠢ ᠮᠢᠨᠢ ᠢᠷᠯᠡᠨᠡ᠃ ᠠᠭᠤᠯᠠᠰ ᠬᠤᠷᠠᠭᠰᠠᠨ ᠴᠠᠰᠤ ᠪᠠᠨ ᠰᠢᠯᠭᠡᠭᠡᠵᠦ ᠨᠠᠷᠠᠨ ᠵᠦᠭ ᠥᠨᠳᠡᠯᠵᠡᠬᠦ ᠳᠤ ᠬᠠᠶᠢᠯ ᠤᠨ ᠤᠰᠤᠨ ᠭᠤᠤ ᠵᠢᠯᠠᠭᠠ ᠪᠠᠷ | ᠭᠤᠷᠴᠢᠭᠢᠨᠠᠨ ᠤᠷᠤᠰᠤᠨᠠ᠃ ᠠᠮᠢᠳᠤᠷᠠᠯ ᠥᠭᠡᠳᠡ ᠲᠠᠢ ᠤᠷᠤᠭᠤ ᠲᠠᠢ ᠭᠡᠳᠡᠭ ᠢ ᠠᠭᠤᠯᠠᠰ ᠪᠢᠳᠡᠨ ᠳᠤ ᠦᠵᠡᠭᠦᠯᠳᠡᠭ ᠴᠦ ᠪᠣᠯᠪᠠ ᠤᠤ︖ ᠡᠰᠡᠬᠦᠯᠡ ᠮᠥᠩᠬᠡ | ᠪᠤᠰᠤ ᠬᠤᠷᠸᠠ ᠶᠢᠨ ᠨᠢᠭᠤᠴᠠ ᠶᠢ ᠲᠠᠨᠢᠭᠤᠯᠬᠤ ᠬᠡᠮᠡᠨ ᠥᠭᠭᠢᠶᠡᠮᠦᠷ ᠰᠠᠨᠠᠳᠠᠭ ᠴᠦ ᠪᠢᠯᠢᠦ⁈ ᠲᠠᠭᠤ ᠦᠭᠡᠢ ᠠᠭᠤᠯᠠᠰ ᠤᠨ ᠲᠤᠩᠭᠠᠯᠠᠭ ᠤᠬᠠᠭᠠᠨ ᠭᠡᠵᠦ | ᠶᠠᠭᠠᠬᠢᠭᠰᠠᠨ ᠭᠤᠶᠤ︕ ᠠᠭᠤᠯᠠᠰ ᠢ ︽ᠡᠪᠬᠡᠭᠰᠡᠨ ᠰᠤᠳᠤᠷ︾ ᠭᠡᠵᠦ ᠤᠶᠠᠩᠭᠠᠯᠠᠵᠤ ᠰᠢᠯᠦᠭᠯᠡᠬᠦ ᠨᠢ ᠪᠤᠷᠤᠭᠤ ᠦᠭᠡᠢ᠃ | ᠢᠴᠡᠭᠡᠯᠡᠭᠰᠡᠨ ᠠᠮᠢᠲᠠᠳ ᠨᠠᠷᠠ ᠵᠢᠪᠠᠷ ᠢᠶᠠᠨ ᠬᠠᠷᠠᠭᠠᠳ ᠨᠠᠶᠢᠷᠠᠮᠳᠠᠭᠤ ᠣᠷᠣᠰᠢᠨᠠ ᠭᠡᠵᠦ ᠶᠠᠭᠤᠲᠠᠢ ᠵᠢᠷᠭᠠᠯ ᠪᠢᠯᠡ︖ ᠲᠦᠮᠡᠨ ᠪᠣᠳᠠᠰ ᠳᠡᠯᠭᠡᠷᠡᠭᠰᠡᠨ | ᠲᠠᠶᠢᠪᠤᠩ ᠠᠮᠤᠭᠤᠯᠠᠩ ᠣᠷᠴᠢᠨ ᠠᠬᠤᠢ ᠲᠠᠢ ᠠᠭᠤᠯᠵᠠᠨ ᠵᠣᠯᠭᠠᠭᠤᠯᠳᠠᠭ ᠨᠢ ᠡᠰᠡᠨᠢᠯ ᠤᠨ ᠬᠠᠪᠤᠷ ᠪᠤᠶᠤ ᠡᠯᠢᠭᠡᠰᠡᠭ ᠰᠢᠨᠡ ᠣᠨ ᠤ ᠢᠪᠡᠭᠡᠯ ᠬᠠᠶᠢᠷᠠ ᠪᠢᠵᠡ᠃ | ︽ᠣᠨ ᠵᠢᠯ ᠥᠭᠰᠥᠬᠦ ᠲᠤᠰᠤᠮ ᠭᠦᠷᠦᠨ ᠲᠦᠷᠦ ᠮᠢᠨᠢ ᠬᠦᠴᠦᠷᠬᠡᠭᠵᠢᠨᠡ᠂ ᠬᠥᠮᠥᠨ ᠵᠤᠨ ᠤ ᠠᠮᠢᠳᠤᠷᠠᠯ ᠬᠥᠭᠵᠢᠨᠡ᠃ ᠬᠦᠰᠡᠯ ᠮᠥᠷᠥᠭᠡᠳᠦᠯ ᠮᠢᠨᠢ | ᠪᠡᠶᠡᠯᠡᠭᠳᠡᠨᠡ᠂ ᠬᠦᠷᠬᠦ ᠢᠷᠡᠭᠡᠳᠦᠢ ᠮᠢᠨᠢ ᠣᠶᠢᠷᠠᠲᠤᠨᠠ︾ ᠭᠡᠵᠦ ᠰᠢᠨᠡ ᠣᠨ ᠢᠶᠠᠨ ᠪᠠᠶᠠᠷ ᠲᠠᠢ ᠤᠭᠲᠤᠬᠤ ᠳᠤ ᠥᠩᠭᠡᠷᠡᠵᠦ ᠬᠤᠯᠠᠳᠠᠭᠰᠠᠨ ᠪᠠᠭᠠ ᠨᠠᠰᠤᠨ ᠤ | ᠤᠴᠠᠷᠠᠯ ᠲᠣᠬᠢᠶᠠᠯᠳᠤᠯ ᠲᠡᠷᠡ ᠴᠠᠭ ᠦᠶᠡ ᠲᠠᠢ ᠪᠠᠨ ᠤᠢ ᠤᠬᠠᠭᠠᠨ ᠳᠤ ᠣᠪᠣᠨ ᠴᠤᠪᠤᠨ ᠣᠷᠣᠵᠤ ᠢᠷᠡᠨᠡ ᠁ | ᠪᠠᠭᠠ ᠪᠠᠶᠢᠬᠤ ᠳᠤ᠂ ᠠᠶᠢᠯ ᠤᠯᠠᠨ ᠢᠶᠠᠷ ᠢᠶᠠᠨ ᠪᠠᠷᠢᠭᠠᠳᠠ ᠶᠢᠨ ᠬᠦᠷᠢᠶᠡᠨ ᠳᠤ ᠴᠤᠭᠯᠠᠷᠠᠵᠤ ᠲᠤᠭ ᠮᠠᠨᠳᠤᠭᠤᠯᠬᠤ ᠶᠣᠰᠣᠯᠠᠯ ᠳᠤ ᠣᠷᠤᠯᠴᠠᠬᠤ ᠨᠢ ᠰᠢᠨᠡ | ᠣᠨ ᠢᠶᠠᠨ ᠤᠭᠲᠤᠬᠤ ᠬᠠᠮᠤᠭ ᠤᠨ ᠭᠦᠷ ᠬᠥᠭᠵᠢᠶᠡᠨᠲᠡᠢ᠂ ᠤᠳᠬᠠ ᠠᠭᠤᠯᠭᠠ ᠲᠠᠢ ᠦᠢᠯᠡ ᠠᠵᠢᠯᠯᠠᠭᠠ ᠪᠠᠶᠢᠵᠤ ᠪᠢᠯᠡ᠃ ᠤᠯᠤᠰ ᠤᠨ ᠰᠦᠯᠳᠡ ᠳᠠᠭᠤᠤ ᠥᠨᠳᠥᠷ | ᠮᠣᠳᠣᠨ ᠳᠡᠭᠡᠷᠡ ᠡᠯᠭᠦᠭᠰᠡᠨ ᠬᠤᠣᠰ ᠯᠠᠪᠠᠷ ᠠᠴᠠ ᠬᠠᠩᠭᠢᠨᠠᠨ ᠳᠠᠭᠤᠷᠢᠰᠬᠤ ᠪᠠᠷ ᠴᠡᠷᠢᠭ ᠬᠤᠪᠴᠠᠰᠤ ᠲᠠᠢ ᠬᠡᠳᠦᠨ ᠵᠠᠯᠠᠭᠤᠰ ᠪᠠᠷᠢᠭᠠᠳᠠ ᠶᠢᠨ ᠭᠡᠷ ᠠᠴᠠ ᠬᠤᠶᠠᠷ | ᠮᠥᠷ ᠢᠶᠠᠷ ᠵᠢᠭᠳᠡ ᠠᠯᠬᠤᠭᠰᠠᠭᠠᠷ ᠭᠠᠷᠴᠤ ᠢᠷᠡᠭᠰᠡᠨ ᠢᠶᠠᠨ ᠬᠦᠷᠢᠶᠡᠨ ᠤ ᠵᠡᠭᠦᠨ ᠡᠮᠦᠨᠡ ᠬᠦᠷᠴᠦ ᠤᠯᠤᠰ ᠤᠨ ᠲᠤᠭ ᠮᠠᠨᠳᠤᠭᠤᠯᠤᠨᠠ᠃ | ᠮᠠᠨ ᠤ ᠭᠠᠴᠠᠭᠠᠨ ᠤ ᠬᠢᠨ ᠤᠯᠤᠰ ᠤᠨ ᠲᠤᠭ ᠮᠠᠨᠳᠤᠭᠤᠯᠬᠤ ᠶᠣᠰᠣᠯᠠᠯ ᠢᠶᠠᠷ ᠠᠷᠭᠠ ᠶᠢᠨ ᠤᠯᠠᠷᠢᠯ ᠤᠨ ᠰᠢᠨᠡ ᠣᠨ ᠢ ᠤᠭᠲᠤᠬᠤ ᠵᠤᠷᠰᠢᠯ ᠢᠶᠠᠨ ᠤᠳᠤ | ᠴᠦ ᠭᠡᠰᠡᠨ ᠪᠠᠷᠢᠮᠲᠠᠯᠠᠭᠰᠠᠭᠠᠷ᠃ ᠡᠵᠢ ᠶᠢᠨ ᠬᠡᠯᠡᠬᠦ ᠪᠠᠷ ︽ᠠᠶᠢᠯ ᠤᠨ ᠱᠦᠵᠢ ᠲᠤᠪᠳᠤᠨ ᠡᠪᠦᠭᠡ ᠠᠴᠠ ᠯᠡ ᠡᠬᠢᠯᠡᠭᠰᠡᠨ ᠁︾ ᠭᠡᠳᠡᠭ᠃ ᠪᠢ ᠳᠠᠩᠳᠠ ᠭᠠᠶᠢᠬᠠᠨ | ᠰᠣᠨᠢᠷᠬᠠᠵᠤ ᠲᠤᠪᠳᠤᠨ ᠡᠪᠦᠭᠡ ᠶᠢᠨ ᠲᠤᠬᠠᠢ ᠡᠵᠢ ᠠᠴᠠ ᠪᠠᠨ ᠠᠰᠠᠭᠤᠬᠤ ᠳᠤ ︽ᠡᠬᠡ ᠣᠷᠣᠨ᠂ ᠠᠷᠠᠳ ᠲᠦᠮᠡᠨ ᠳᠡᠭᠡᠨ ᠲᠤᠶᠢᠯ ᠤᠨ ᠬᠠᠶᠢᠷᠠᠲᠠᠢ᠃ ᠨᠡᠷᠡ | ᠨᠢᠳᠡᠷ ᠲᠡᠭᠡᠨ ᠲᠡᠩᠴᠡᠭᠰᠡᠨ ᠨᠢᠭᠡᠨ ᠡᠪ ᠬᠠᠮᠲᠤ ᠨᠠᠮ ᠤᠨ ᠭᠡᠰᠢᠭᠦᠨ ᠪᠣᠯᠣᠨᠠ︾ ᠭᠡᠵᠦ ᠲᠠᠶᠢᠯᠪᠤᠷᠢᠯᠠᠨ ᠶᠠᠷᠢᠵᠤ ᠥᠭᠴᠡᠢ᠃ | ᠤᠳᠤ ᠤᠯᠤᠰ ᠤᠨ ᠲᠤᠭ ᠮᠠᠨᠳᠤᠭᠤᠯᠬᠤ ᠳᠤ ᠭᠠᠴᠠᠭᠠᠨ ᠤ ᠨᠢᠭᠲᠠᠯᠠᠨ ᠪᠤᠳᠤᠬᠴᠢ ᠭᠡᠷ ᠳᠣᠲᠣᠷᠠᠬᠢ ᠲᠠᠭᠤ ᠲᠣᠮᠣᠷᠠᠭᠤᠯᠤᠭᠴᠢ ᠮᠠᠰᠢᠨ ᠤ ᠪᠠᠨ ᠵᠢᠵᠢᠭᠬᠡᠨ | ᠳᠠᠷᠤᠪᠴᠢ ᠪᠠᠷ ᠬᠦᠷᠢᠶᠡᠨ ᠳᠤᠮᠳᠠ ᠠᠴᠠ ᠵᠠᠬᠢᠷᠤᠨᠠ᠃ ᠰᠢᠨᠵᠢᠯᠡᠬᠦ ᠤᠬᠠᠭᠠᠨ ᠤ ᠬᠥᠭᠵᠢᠯᠲᠡ ᠶᠢ ᠪᠢᠰᠢᠷᠡᠬᠦ ᠦᠭᠡᠢ ᠪᠠᠶᠢᠬᠤ ᠶᠢᠨ ᠠᠷᠭᠠ ᠦᠭᠡᠢ᠃ ᠦᠳᠡᠰᠢ ᠶᠢᠨ | ᠰᠡᠯᠡᠭᠦᠨ ᠳᠤ ᠭᠠᠴᠠᠭᠠᠨ ᠤ ᠬᠦᠷᠢᠶᠡᠨ ᠳᠤ ᠥᠩᠭᠡ ᠪᠦᠷᠢ ᠶᠢᠨ ᠬᠤᠸᠠᠷ ᠫᠤᠤᠵᠢᠩ ᠰᠥᠨᠢ ᠶᠢᠨ ᠣᠭᠲᠠᠷᠭᠤᠢ ᠳᠤ ᠰᠣᠯᠣᠩᠭᠠᠷᠠᠨᠠ᠃ | ︽ᠨᠠᠮ ᠲᠦᠷᠦ ᠶᠢᠨ ᠰᠠᠶᠢᠨ ᠢᠶᠠᠷ ᠤᠳᠤ ᠴᠢᠨᠢ ᠡᠳᠦᠷ ᠪᠣᠯᠭᠠᠨ ᠰᠢᠨᠡᠯᠡᠵᠦ ᠪᠤᠢ︾ ᠭᠡᠵᠦ ᠡᠪᠦᠭᠡᠳ ᠤᠨ ᠵᠣᠭᠤᠭ ᠦᠷᠭᠦᠯᠵᠢᠯᠡᠭᠡᠳ ᠬᠥᠳᠡᠭᠡ ᠨᠤᠲᠤᠭ ᠲᠤ | ᠬᠥᠭᠵᠢᠯ ᠤᠨ ᠠᠭᠤᠷ ᠠᠮᠢᠰᠬᠤᠯ ᠪᠢᠯᠬᠠᠨᠠ᠃ ᠵᠠᠯᠠᠭᠤ ᠠᠮᠠᠷᠠᠭ ᠬᠤᠣᠰ ᠤᠳ ᠮᠠᠰᠢᠨ ᠲᠡᠷᠭᠡ ᠪᠠᠨ ᠵᠢᠯᠤᠭᠤᠳᠴᠤ ᠬᠤᠳᠠ ᠣᠷᠣᠭᠠᠳ ᠨᠢᠳᠦ ᠪᠠᠨ ᠬᠤᠵᠢᠷᠯᠠᠵᠤ | ᠰᠡᠳᠬᠢᠯ ᠰᠠᠨᠠᠭᠠ ᠪᠠᠨ ᠰᠡᠷᠭᠦᠭᠡᠵᠦ ᠢᠷᠡᠨᠡ᠃ ᠡᠰᠡᠨᠢᠯ ᠤᠨ ᠬᠠᠪᠤᠷ ᠰᠠᠭᠠᠲᠠᠭᠰᠠᠨ ᠬᠥᠳᠡᠭᠡ ᠨᠤᠲᠤᠭ ᠤᠨ ᠰᠢᠨᠡ ᠨᠢᠭᠡᠨ ᠣᠨ ᠪᠠᠶᠠᠷ ᠭᠦᠷ ᠲᠠᠢ ᠲᠤᠤᠵᠠ ᠪᠠᠨ | ᠬᠠᠶᠢᠴᠢᠯᠠᠳᠠᠭ ᠶᠤᠮ ᠪᠠᠶᠢᠨᠠ᠃ | ᠤᠷᠠᠨ ᠬᠥᠬᠦᠭᠡ ᠤᠢ ᠬᠥᠪᠴᠢ ᠳᠤ ᠤᠶᠠᠬᠠᠨ ᠢᠷᠠᠭᠤ ᠳᠣᠩᠭᠤᠳᠴᠤ | ᠤᠷᠤᠭ ᠬᠠᠯᠵᠠᠨ ᠪᠤᠭᠤ ᠬᠠᠳᠠ ᠠᠰᠬᠠ ᠲᠠᠮᠵᠢᠨ ᠤᠷᠤᠮᠳᠠᠵᠤ | ᠣᠲᠣᠷ ᠨᠡᠭᠦᠳᠡᠯ ᠤᠨ ᠴᠤᠪᠤᠭᠠ ᠠᠯᠤᠰ ᠲᠤ ᠰᠤᠨᠤᠯᠵᠠᠨ ᠬᠤᠯᠠᠳᠠᠵᠤ | ᠤᠨᠠᠭᠠᠨ ᠨᠤᠲᠤᠭ ᠤᠨ ᠬᠠᠪᠤᠷ ᠤᠳᠬᠠ ᠲᠡᠭᠦᠯᠳᠡᠷ ᠰᠠᠨᠠᠭᠳᠠᠨᠠ ᠁ ᠭᠡᠰᠡᠨ ᠨᠢᠭᠡᠨ ᠰᠢᠯᠦᠭᠴᠢ ᠶᠢᠨ ︽ᠬᠠᠪᠤᠷ︾ ᠬᠡᠮᠡᠬᠦ ᠢᠷᠠᠭᠤ ᠨᠠᠶᠢᠷᠠᠭ ᠤᠨ ᠮᠥᠷ | ᠪᠠᠳᠠᠭ ᠮᠢᠨᠤ ᠰᠡᠷᠡᠯ ᠢ ᠴᠢᠪᠬᠠᠳᠠᠨ ᠵᠢᠷᠦᠬᠡᠨ ᠳᠤ ᠮᠢᠨᠢ ᠭᠡᠷᠡᠯᠲᠦᠨᠡ᠃ ᠲᠡᠶᠢᠮᠦ ᠠ᠋᠂ ᠰᠢᠨᠡ ᠣᠨ ᠢᠶᠠᠨ ᠤᠭᠲᠤᠬᠤ ᠳᠤ ᠰᠥᠨᠢ ᠨᠢ ᠭᠦᠷᠳᠡᠯᠡ ᠰᠡᠳᠬᠢᠯ ᠳᠤ | ᠳᠤᠯᠠᠭᠠᠨ᠂ ᠲᠦᠭᠡᠭᠰᠡᠨ ᠣᠳᠣᠳ ᠨᠢ ᠨᠠᠷᠠᠪᠴᠢᠨ ᠳᠡᠭᠡᠷᠡ ᠰᠠᠭᠤᠭᠠᠳ ᠶᠠᠭᠤ ᠨᠢᠭᠡ ᠰᠢᠪᠡᠨᠡᠮᠡᠷ᠂ ᠨᠠᠷᠠ ᠨᠢ ᠴᠦ ᠤᠤᠯ ᠠᠴᠠ ᠪᠠᠨ ᠡᠷᠲᠡ ᠤᠷᠭᠤᠭᠠᠳ ᠨᠠᠳᠠ | ᠤᠷᠤᠭᠤ ᠢᠨᠢᠶᠡᠭᠰᠡᠭᠡᠷ ᠢᠷᠡᠬᠦ ᠰᠢᠭ ᠪᠤᠳᠤᠬᠳᠠᠭᠠᠳ ᠪᠠᠶᠢᠳᠠᠭ ᠢ ᠦᠭᠡ ᠪᠠᠷ ᠬᠡᠷᠬᠢᠨ ᠵᠦᠢᠷᠯᠡᠬᠦ ᠪᠤᠢ︕ | ᠵᠡᠭᠦᠳᠦᠨ ᠳᠤ ᠮᠢᠨᠢ ᠴᠢ ᠭᠡᠷᠡᠯ ᠪᠣᠯᠵᠤ ᠰᠣᠯᠣᠩᠭᠠ ᠶᠢᠨ ᠥᠩᠭᠡ ᠪᠠᠷ ᠰᠠᠴᠤᠷᠠᠵᠤ ᠢᠷᠡᠨᠡ᠂ | ᠵᠢᠷᠦᠬᠡᠨ ᠳᠤ ᠮᠢᠨᠢ ᠴᠢ ᠵᠠᠮᠴᠢ ᠪᠣᠯᠵᠤ ᠤᠶᠠᠬᠠᠨ ᠳᠠᠭᠤᠤ ᠪᠠᠷ ᠬᠠᠩᠭᠢᠨᠠᠵᠤ ᠢᠷᠡᠨᠡ᠂ | ᠵᠥᠩᠨᠡᠯ ᠳᠤ ᠮᠢᠨᠢ ᠴᠢ ᠰᠢᠯᠦᠭ ᠪᠣᠯᠵᠤ ᠵᠢᠷᠭᠠᠯ ᠤᠨ ᠮᠦᠰᠢᠶᠡᠳᠦ ᠪᠠᠷ ᠠᠩᠬᠢᠯᠵᠤ ᠢᠷᠡᠨᠡ᠂ | ᠵᠦᠢᠴᠢᠯᠡᠯ ᠳᠤ ᠮᠢᠨᠢ ᠴᠢ ᠬᠦᠰᠡᠯ ᠪᠣᠯᠵᠤ ᠰᠠᠶᠢᠬᠠᠨ ᠤ ᠢᠷᠦᠭᠡᠯ ᠢᠶᠠᠷ ᠭᠢᠯᠠᠯᠵᠠᠵᠤ ᠢᠷᠡᠨᠡ᠂ | ᠥᠶᠥᠭ ᠲᠠᠩᠰᠤᠭ ᠠᠮᠢᠳᠤᠷᠠᠯ᠂ ᠥᠷᠨᠢᠵᠦ ᠳᠡᠯᠭᠡᠷᠡᠬᠦ ᠶᠢᠨ ᠵᠦᠩ᠂ ᠡᠩᠬᠡ ᠠᠮᠤᠭᠤᠯᠠᠩ ᠣᠷᠣᠰᠢᠬᠤᠢ᠂ ᠠᠯᠢᠪᠠ ᠪᠦᠭᠦᠨ ᠴᠢᠮᠠ ᠠᠴᠠ ᠰᠢᠨᠡ ᠪᠠᠷ | ᠡᠬᠢᠯᠡᠨᠡ - | ᠥᠭᠡᠳᠡ ᠬᠡᠶᠢᠮᠣᠷᠢ ᠲᠠᠢ 2025 ᠣᠨ ᠮᠢᠨᠢ︕ | | |