| ᠥᠬᠢᠨ ᠮᠢᠨᠢ ᠦᠵᠡᠵᠦ ᠪᠠᠶᠢᠲᠠᠯᠠ ᠠᠷᠪᠠ ᠬᠦᠷᠴᠢᠬᠡᠯᠡ᠃ ᠠᠰᠲᠠᠭᠠᠨ ᠨᠢᠭᠡ ᠤᠨᠲᠠᠯᠭᠠ ᠶᠢᠨ ᠦᠷᠦᠭᠡ ᠪᠠᠶᠢᠳᠠᠭ ᠪᠤᠯᠪᠠᠴᠤ ᠡᠵᠢ ᠥᠬᠢᠨ ᠬᠤᠶᠠᠭᠤᠯᠠ ᠪᠠᠨ | ᠰᠠᠯᠵᠤ ᠬᠤᠨᠣᠬᠤ ᠶᠠᠩᠵᠤ ᠦᠭᠡᠢ᠃ ᠠᠩᠭᠢ ᠶᠢᠨ ᠬᠡᠨ ᠬᠡᠨ ᠴᠢᠨᠢ ᠥᠪᠡᠷ ᠤᠨ ᠤᠨᠲᠠᠯᠭᠠ ᠶᠢᠨ ᠦᠷᠦᠭᠡ ᠲᠠᠢ ᠪᠢᠰᠢᠦ᠂ ᠪᠢ ᠴᠢᠮᠠᠳᠤ ᠪᠠᠰᠠ ᠨᠢᠭᠡ ᠤᠨᠲᠠᠯᠭᠠ ᠶᠢᠨ | ᠦᠷᠦᠭᠡ ᠭᠠᠷᠭᠠᠵᠤ ᠦᠭᠭᠦᠶᠡ ᠭᠡᠬᠦ ᠳᠤ ᠥᠬᠢᠨ ᠬᠠᠷᠢᠨ ᠠᠶᠤᠨᠠ ᠭᠡᠳ ᠲᠠᠰᠤ ᠬᠠᠯᠭᠠᠬᠤ ᠦᠭᠡᠢ᠃ ᠵᠠ ᠲᠡᠭᠡᠭᠡᠳ ᠡᠨᠡ ᠭᠤᠷᠪᠠᠳᠤᠭᠠᠷ ᠣᠨ ᠤ ᠰᠣᠷᠣᠬᠴᠢ | ᠮᠠᠨ ᠤ ᠬᠤᠶᠠᠷ ᠤᠨ ᠳᠤᠮᠳᠠ ᠪᠧᠷᠯᠢᠨ ᠬᠡᠷᠡᠮ ᠪᠣᠯᠣᠭᠠᠳ ᠤᠨᠲᠠᠵᠤ ᠳᠠᠰᠤᠭᠰᠠᠨ ᠪᠠᠶᠢᠳᠠᠭ᠃ | ᠪᠢ ᠤᠷᠢᠳ ᠢᠶᠠᠷ ᠥᠬᠢᠨ ᠳᠡᠭᠡᠨ ᠤᠨᠲᠠᠬᠤ ᠦᠷᠦᠭᠡ ᠵᠣᠬᠢᠶᠠᠵᠤ ᠥᠭᠭᠦᠨᠡ ᠭᠡᠵᠦ ᠪᠤᠳᠤᠯᠠ᠃ | ᠦᠨᠡᠨᠳᠡᠭᠡᠨ ᠡᠨᠡ ᠦᠷᠦᠭᠡ ᠵᠤᠨ ᠳᠠᠭᠠᠨ ᠮᠠᠰᠢ ᠰᠡᠷᠢᠭᠦᠬᠡᠨ᠂ ᠪᠢ ᠬᠡᠳᠦᠨ ᠵᠤᠨ ᠡᠨᠡ ᠥᠷᠥᠭᠡᠨ ᠳᠤ ᠪᠠᠶᠢᠭᠠᠳ ᠪᠠᠶᠢᠭᠰᠠᠨ᠃ ᠡᠪᠦᠯ ᠪᠣᠯᠬᠤᠯᠠᠷ ᠵᠢᠪᠠᠷ | ᠨᠡᠪᠲᠡᠷᠡᠭᠡᠳ ᠬᠥᠮᠥᠨ ᠬᠤᠨᠣᠵᠤ ᠪᠤᠯᠳᠠᠭ ᠦᠭᠡᠢ ᠲᠤᠯᠠ ᠬᠠᠳᠠᠮ ᠤᠨ ᠬᠢ ᠰᠢᠨᠡ ᠠᠰᠠᠷ ᠠᠪᠬᠤ ᠳᠤ ᠳᠣᠲᠣᠷᠠ ᠨᠢ ᠪᠠᠶᠢᠭᠰᠠᠨ ᠬᠤᠶᠠᠷ ᠬᠥᠮᠥᠨ ᠤ ᠣᠷᠣ ᠶᠢ | ᠲᠡᠳᠡᠨᠡᠶᠢᠬᠢᠨ ᠳᠤ ᠥᠭᠭᠦᠭᠡᠳ ᠶᠠᠪᠤᠭᠤᠯᠴᠢᠬᠠᠵᠠᠢ᠃ ᠬᠤᠶᠠᠷ ᠬᠥᠮᠥᠨ ᠤ ᠣᠷᠣ ᠭᠠᠷᠭᠠᠭᠰᠠᠨ ᠪᠠᠶᠢᠲᠠᠯᠠ ᠲᠡᠷᠡ ᠦᠷᠦᠭᠡ ᠠᠭᠤᠵᠢᠮ ᠪᠣᠯᠵᠤ ᠰᠠᠨᠠᠭᠳᠠᠭᠰᠠᠨ ᠦᠭᠡᠢ᠂ | ᠲᠡᠷᠡᠬᠡᠨ ᠳᠣᠣᠷᠠ ᠪᠠᠨ ᠬᠥᠯ ᠭᠢᠰᠬᠢᠬᠦ ᠭᠠᠵᠠᠷ ᠦᠭᠡᠢ ︽ᠬᠥᠮᠥᠷᠭᠡ︾ ᠶᠢᠨ ᠭᠡᠷ ᠪᠣᠯᠵᠤ ᠬᠤᠪᠢᠷᠠᠭᠰᠠᠨ ᠶᠤᠮ᠃ | ᠤᠳᠤ ᠬᠠᠮᠤᠭ ᠲᠡᠷᠢᠭᠦᠨ ᠤ ᠠᠵᠢᠯ ᠨᠢ ᠡᠳᠡᠭᠡᠷ ᠣᠪᠣᠨ ᠴᠤᠪᠤᠨ ᠣᠷᠣᠵᠤ ᠢᠷᠡᠭᠰᠡᠨ ᠪᠣᠭᠤᠳᠠᠯ ᠪᠠᠭᠯᠠᠭᠠ᠂ ᠠᠪᠳᠠᠷᠠ ᠬᠤᠷᠭᠤ ᠶᠢᠨ ᠵᠦᠢᠯ ᠤᠳ ᠢ | ᠬᠠᠮᠢᠭᠠ ᠤᠷᠤᠭᠤᠯᠬᠤ ᠪᠤᠢ ᠭᠡᠳᠡᠭ ᠠᠰᠠᠭᠤᠳᠠᠯ ᠭᠠᠷᠴᠤ ᠢᠷᠡᠪᠡ᠃ ᠪᠢ ᠭᠡᠷ ᠤᠨ ᠳᠡᠭᠡᠪᠦᠷ ᠢ ᠲᠣᠭᠤᠷᠢᠭᠤᠯᠤᠨ ᠨᠢᠭᠡ ᠴᠠᠭᠠᠷᠢᠭ ᠮᠣᠳᠣᠨ ᠬᠠᠶᠢᠷᠴᠠᠭ ᠴᠣᠬᠢᠭᠤᠯᠬᠤ | ᠤᠬᠠᠭᠠᠨ ᠢ ᠪᠤᠳᠤᠵᠦ ᠣᠯᠪᠠ᠃ ᠲᠡᠭᠡᠭᠰᠡᠭᠡᠷ ᠡᠳᠡᠭᠡᠷ ᠪᠤᠢ ᠪᠦᠬᠦᠢ ᠬᠤᠪᠴᠠᠰᠤ ᠱᠠᠬᠠᠢ ᠵᠠᠷᠤᠳᠠᠯ ᠬᠡᠷᠡᠭᠰᠡᠯ ᠤᠨ ᠵᠦᠢᠯ ᠪᠦᠷ ᠬᠥᠮᠥᠨ ᠤ ᠭᠠᠷ ᠬᠥᠯ ᠠᠴᠠ | ᠳᠠᠯᠳᠠᠬᠠᠨ ᠳᠡᠭᠡᠭᠰᠢ ᠬᠥᠭᠡᠷᠦᠭᠡᠳ ᠭᠠᠷᠴᠢᠬᠠᠨᠠ᠂ ᠦᠷᠦᠭᠡ ᠠᠭᠤᠵᠢᠮ ᠪᠣᠯᠣᠨᠠ᠂ ᠭᠠᠭᠴᠠ ᠬᠥᠮᠥᠨ ᠤ ᠣᠷᠣ ᠲᠠᠯᠪᠢᠬᠤ ᠳᠤ ᠮᠥᠨ ᠠᠭᠤᠵᠢᠮ ᠰᠠᠨᠠᠭᠳᠠᠨᠠ᠃ | ᠲᠠᠭᠢᠭᠠᠳ ᠬᠡᠷᠡᠮ ᠬᠠᠨᠠ ᠶᠢ ᠨᠢ ᠬᠡᠦᠬᠡᠳ ᠤᠨ ᠣᠨᠴᠠᠯᠢᠭ ᠲᠤ ᠨᠡᠶᠢᠴᠡᠭᠰᠡᠨ ᠺᠠᠷᠲ᠋ᠣᠨ ᠤᠷᠠᠯᠠᠯ ᠢᠶᠠᠷ ᠴᠢᠮᠡᠪᠡᠯ ᠮᠠᠭᠤ ᠵᠣᠯᠢᠭ ᠥᠪᠡᠷ ᠲᠡᠭᠡᠨ ᠣᠷᠣ ᠪᠠᠨ | ᠲᠡᠪᠡᠷᠢᠭᠡᠳ ᠣᠷᠣᠵᠤ ᠢᠷᠡᠨᠡ ᠳ᠋ᠠ ᠭᠡᠵᠦ ᠪᠢ ᠬᠡᠢ ᠰᠠᠨᠠᠪᠠ᠃ ᠪᠠᠰᠠ ᠴᠢᠨᠠᠭᠰᠢ ᠨᠢ ᠤᠷᠭᠤᠭᠤᠯᠵᠦ ᠪᠤᠳᠤᠬᠤ ᠵᠠᠢ ᠴᠢᠯᠦᠭᠡ ᠮᠥᠨ ᠪᠠᠶᠢᠨᠠ᠃ ᠳᠡᠭᠡᠪᠦᠷ ᠠᠴᠠ | ᠤᠨᠵᠢᠭᠤᠯᠤᠭᠰᠠᠨ ᠮᠣᠳᠣᠨ ᠠᠪᠳᠠᠷᠠ ᠶᠢᠨ ᠳᠣᠣᠭᠤᠷ ᠴᠣᠩᠬᠤ ᠶᠢ ᠭᠠᠷᠭᠠᠭᠠᠳ ᠬᠡᠷᠡᠭᠯᠡᠵᠦ ᠪᠤᠯᠬᠤ ᠭᠤᠷᠪᠠᠨ ᠬᠠᠨᠠ ᠶᠢᠨ ᠵᠠᠢ ᠪᠠᠶᠢᠨᠠ᠃ ᠵᠡᠭᠦᠨ ᠬᠠᠨᠠ ᠪᠣᠯ | ᠥᠬᠢᠨ ᠪᠢᠳᠡ ᠬᠤᠶᠠᠷ ᠤᠨ ᠨᠣᠮ ᠤᠨ ᠵᠢᠶᠠᠵᠠ᠃ ᠡᠮᠦᠨᠡ ᠬᠠᠨᠠ ᠪᠣᠯ ᠥᠬᠢᠨ ᠤ ᠬᠤᠪᠴᠠᠰᠤᠨ ᠬᠤᠷᠭᠤ᠂ ᠪᠠᠷᠠᠭᠤᠨ ᠬᠠᠨᠠ ᠪᠣᠯ ᠡᠬᠡᠨᠡᠷ ᠤᠨ ᠬᠤᠪᠴᠠᠰᠤᠨ | ᠬᠤᠷᠭᠤ ᠭᠡᠵᠦ ᠠᠩᠬᠠ ᠲᠥᠰᠥᠪᠯᠡᠪᠡ᠃ ᠪᠢ ᠲᠡᠷᠡ ᠣᠯᠳᠠᠭᠰᠠᠨ ᠭᠠᠭᠴᠠ ᠬᠠᠨᠠ ᠶᠢᠨ ᠨᠣᠮ ᠤᠨ ᠬᠤᠷᠭᠤ ᠪᠠᠨ ᠪᠤᠳᠤᠭᠠᠳ ᠬᠡᠴᠢᠨᠡᠭᠡᠨ ᠰᠥᠨᠢ ᠤᠨᠲᠠᠵᠤ ᠣᠷᠣᠬᠤ | ᠦᠭᠡᠢ ᠬᠥᠭᠰᠡᠨ ᠪᠠᠶᠠᠷᠯᠠᠵᠤ ᠪᠠᠶᠢᠯᠠ᠃ ᠨᠣᠮ ᠤᠨ ᠬᠤᠷᠭᠤᠨ ᠤ ᠳᠣᠣᠷᠠ ᠬᠡᠰᠡᠭ ᠢᠶᠠᠷ ᠨᠢ ᠪᠢᠴᠢᠭ ᠤᠨ ᠰᠢᠷᠡᠭᠡ ᠬᠢᠯᠭᠡᠨᠡ᠂ ᠺᠤᠮᠫᠢᠦ᠋ᠲ᠋ᠧᠷ ᠲᠠᠯᠪᠢᠬᠤ ᠵᠠᠢ ᠭᠠᠷᠭᠠᠨᠠ᠃ | ᠬᠤᠵᠢᠮ ᠳᠠᠭᠠᠨ ᠪᠤᠳᠤᠭᠲᠤ ᠵᠢᠷᠤᠭ ᠴᠤ ᠭᠠᠷᠭᠠᠵᠤ ᠴᠢᠳᠠᠬᠤ ᠳᠠᠷᠤᠮᠠᠯᠯᠠᠬᠤ ᠮᠠᠰᠢᠨ ᠤᠭᠰᠠᠷᠠᠨᠠ ᠭᠡᠵᠦ ᠬᠡᠢ ᠰᠠᠨᠠᠵᠤ ᠠᠮᠵᠢᠪᠠ᠃ ᠪᠢ ᠭᠤᠷᠪᠠᠨ ᠬᠠᠨᠠ ᠶᠢ | ᠬᠡᠷᠬᠢᠨ ᠬᠤᠪᠢᠶᠠᠬᠤ ᠲᠤᠬᠠᠢ ᠡᠳᠦᠷᠵᠢᠨ ᠰᠥᠨᠢᠵᠢᠨ ᠪᠤᠳᠤᠬᠰᠠᠭᠠᠷ ᠪᠠᠶᠢᠵᠤ ᠡᠪᠲᠡᠢ ᠲᠥᠰᠥᠯ ᠭᠠᠷᠭᠠᠭᠰᠠᠨ᠃ ᠦᠨᠡᠨᠳᠡᠭᠡᠨ ᠳᠦᠭᠦᠷᠡᠩ ᠨᠣᠮ ᠲᠠᠢ ᠨᠣᠮ ᠤᠨ | ᠵᠢᠶᠠᠵᠠ ᠪᠣᠯ ᠮᠢᠨᠤ ᠡᠳᠦᠷ ᠤᠨ ᠪᠤᠳᠤᠯ ᠰᠥᠨᠢ ᠶᠢᠨ ᠵᠡᠭᠦᠳᠦ ᠪᠠᠶᠢᠭᠰᠠᠨ ᠶᠤᠮ ᠠ᠋︕ ᠪᠢ ᠥᠪᠡᠷ ᠤᠨ ᠢᠶᠠᠨ ᠭᠡᠰᠡᠨ ᠨᠢᠭᠡ ᠨᠣᠮ ᠤᠨ ᠬᠤᠷᠭᠤ ᠲᠠᠢ ᠪᠤᠯᠬᠤ ᠰᠠᠨ | ᠭᠡᠵᠦ ᠬᠡᠴᠢᠨᠡᠭᠡᠨ ᠰᠥᠨᠢ ᠵᠡᠭᠦᠳᠦᠯᠡᠵᠦ ᠥᠩᠭᠡᠷᠡᠪᠡ ᠳ᠋ᠠ᠃ ᠬᠠᠮᠤᠭ ᠤᠨ ᠳᠣᠣᠷᠠ ᠳᠠᠪᠬᠤᠷᠭᠠ ᠳᠤᠨᠢ ᠥᠬᠢᠨ ᠤ ᠪᠠᠨ ᠨᠣᠮ ᠢ ᠲᠠᠯᠪᠢᠨᠠ᠃ ᠳᠡᠭᠡᠭᠦᠷ ᠨᠢᠭᠡ ᠬᠡᠰᠡᠭ | ᠲᠤᠨᠢ ᠪᠤᠢ ᠪᠦᠬᠦᠢ ᠲᠠᠨᠢᠳᠠᠭ ᠬᠥᠮᠥᠰ ᠤᠨ ᠢᠶᠠᠨ ᠨᠣᠮ ᠢ ᠵᠡᠷᠭᠡᠯᠡᠨᠡ᠃ ᠲᠡᠭᠦᠨ ᠠᠴᠠ ᠳᠡᠭᠡᠭᠰᠢ ᠨᠢ ᠮᠣᠩᠭᠤᠯ ᠤᠷᠠᠨ ᠵᠣᠬᠢᠶᠠᠯ᠂ ᠪᠠᠰᠠ ᠨᠢᠭᠡ ᠳᠡᠭᠲᠡᠷ ᠲᠤᠨᠢ | ᠮᠣᠩᠭᠤᠯ ᠲᠡᠦᠬᠡ ᠰᠣᠶᠣᠯ ᠤᠨ ᠨᠣᠮ᠂ ᠲᠠᠷᠠᠭᠠ ᠨᠢ ᠬᠢᠲᠠᠳ ᠤᠷᠠᠨ ᠵᠣᠬᠢᠶᠠᠯ᠂ ᠬᠠᠮᠤᠭ ᠤᠨ ᠳᠡᠭᠡᠳᠦ ᠳᠡᠭᠲᠡᠷ ᠲᠤᠨᠢ ᠰᠡᠳᠬᠦᠯ ᠪᠠ ᠰᠤᠯᠠ ᠨᠣᠮ ᠤᠳ ᠭᠡᠵᠦ ᠪᠦᠷ | ᠪᠢᠰᠢᠯᠭᠠᠨ ᠪᠤᠳᠤᠵᠦ ᠠᠮᠵᠢᠵᠠᠢ᠃ ᠵᠡᠭᠦᠨ ᠬᠠᠨᠠ ᠪᠠ ᠡᠮᠦᠨᠡ ᠬᠠᠨᠠ ᠶᠢᠨ ᠵᠣᠯᠭᠠᠭᠤᠷ ᠢ ᠨᠢ ᠤᠯᠠᠨ ᠳᠡᠭᠲᠡᠷᠯᠢᠭᠲᠦ ᠬᠠᠭᠠᠯᠭᠠᠨ ᠬᠠᠪᠲᠠᠰᠤ ᠦᠭᠡᠢ ᠲᠠᠯᠪᠢᠭᠤᠷ ᠢᠶᠠᠷ | ᠵᠣᠯᠭᠠᠭᠤᠯᠵᠤ᠂ ᠳᠣᠲᠣᠷᠠ ᠨᠢ ᠥᠬᠢᠨ ᠪᠢᠳᠡ ᠬᠤᠶᠠᠷ ᠤᠨ ᠲᠣᠯᠢ ᠪᠢᠴᠢᠭ ᠮᠡᠲᠦᠰ ᠤᠨ ᠪᠦᠳᠦᠭᠦᠨ ᠨᠣᠮ ᠪᠤᠶᠤ ᠣᠯᠣᠭᠰᠠᠨ ᠮᠧᠲᠠᠯ ᠦᠨᠡᠮᠯᠡᠯ ᠢᠶᠠᠨ ᠲᠠᠯᠪᠢᠨᠠ | ᠭᠡᠵᠦ ᠲᠥᠰᠥᠭᠡᠯᠡᠯᠡ᠃ | - ᠦᠯᠡᠳᠡᠭᠰᠡᠨ ᠴᠠᠯᠢᠩ ᠢ ᠴᠢᠨᠢ ᠬᠡᠵᠢᠶᠡ ᠥᠭᠬᠦ ᠭᠡᠵᠦ ᠪᠠᠶᠢᠭᠠ ᠶᠤᠮ︖ ᠭᠡᠵᠦ ᠭᠡᠷᠭᠡᠢ ᠮᠢᠨᠢ ᠡᠳᠦᠷ ᠤᠨ ᠮᠠᠷᠭᠠᠰᠢ ᠠᠰᠠᠭᠤᠨᠠ᠃ ᠪᠢ ᠨᠠᠶᠠᠨ ᠵᠦᠢᠯ ᠤᠨ | ᠰᠢᠯᠲᠠᠭ ᠬᠡᠯᠡᠭᠰᠡᠭᠡᠷ ᠪᠠᠶᠢᠵᠤ ᠰᠢᠨᠡ ᠰᠢᠯᠲᠠᠭ ᠪᠤᠳᠤᠵᠦ ᠣᠯᠬᠤ ᠳᠤ ᠬᠦᠴᠢᠷᠳᠡᠬᠦ ᠪᠣᠯᠵᠠᠢ᠃ ᠲᠡᠭᠡᠭᠡᠳ ᠠᠷᠭᠠ ᠪᠠᠷᠠᠬᠤ ᠳᠠᠭᠠᠨ᠄ ︽ᠪᠠᠶᠢᠭᠤᠯᠭᠠ ᠶᠢᠨ ᠨᠢᠷᠪᠠ | ᠬᠡᠦᠬᠡᠳ ᠠᠪᠬᠤ ᠭᠡᠵᠦ ᠪᠡᠭᠡᠵᠢᠩ ᠣᠷᠣᠭᠠᠳ ᠶᠠᠪᠤᠭᠰᠠᠨ᠂ ᠵᠢᠯ ᠭᠠᠷᠤᠭᠠᠳ ᠰᠠᠶ᠋ᠢ ᠢᠷᠡᠨᠡ︾ ᠭᠡᠵᠦ ᠬᠠᠭᠠ ᠫᠤᠤᠳᠠᠴᠢᠬᠠᠪᠠ᠃ | - ᠲᠡᠷᠡ ᠴᠠᠯᠢᠩ ᠢ ᠴᠢᠨᠢ ᠥᠭᠪᠡᠯ ᠴᠢ ᠳᠤᠷᠠ ᠪᠠᠷ ᠢᠶᠠᠨ ᠵᠠᠷᠤᠵᠤ ᠪᠤᠯᠬᠤ ᠦᠭᠡᠢ᠂ ᠥᠬᠢᠨ ᠤ ᠴᠢᠨᠢ ᠠᠩᠭ᠍ᠯᠢ ᠭᠡᠯᠡ ᠨᠥᠬᠦᠭᠰᠡᠨ ᠲᠥᠯᠥᠪᠦᠷᠢ᠂ ᠲᠡᠭᠦᠯᠳᠡᠷ | ᠬᠤᠭᠤᠷ ᠰᠤᠷᠤᠬᠰᠠᠨ ᠲᠥᠯᠥᠪᠦᠷᠢ ᠭᠡᠳ ᠬᠡᠳᠦᠨ ᠮᠢᠩᠭᠠ ᠥᠷᠢᠲᠦᠭᠡᠳ ᠪᠠᠶᠢᠨᠠ᠃ ᠣᠯᠣᠭᠰᠠᠭᠠᠷ ᠨᠠᠳᠠ ᠠᠪᠴᠢᠷᠠᠵᠤ ᠥᠭ ᠭᠡᠵᠦ ᠡᠮᠡ ᠬᠠᠭᠠᠨ ᠡᠳᠦᠷ ᠤᠨ | ᠮᠠᠷᠭᠠᠰᠢ ᠬᠠᠲᠠᠭᠤ ᠵᠠᠷᠯᠢᠭ ᠪᠠᠭᠤᠨᠠ᠃ ᠦᠨᠡᠨᠳᠡᠭᠡᠨ ᠲᠡᠭᠦᠨ ᠢ ᠬᠡᠵᠢᠶᠡᠨᠡᠢ ᠣᠯᠴᠢᠬᠠᠭᠠᠳ ᠲᠠᠷᠢᠶᠠᠯᠠᠩ ᠤᠨ ᠪᠠᠩᠬᠢ ᠶᠢᠨ ᠺᠠᠷᠲ ᠳᠠᠭᠠᠨ ᠣᠷᠣᠭᠤᠯᠵᠤ ᠬᠠᠷᠮᠠᠨ ᠳᠠᠭᠠᠨ | ᠠᠪᠴᠤ ᠶᠠᠪᠤᠭᠠ ᠶᠤᠮ᠃ | - ᠴᠢ ᠡᠨᠡ ᠬᠡᠳᠦᠨ ᠡᠳᠦᠷ ᠭᠡᠷ ᠤᠨ ᠪᠠᠷᠠ ᠬᠠᠷᠠᠬᠤ ᠦᠭᠡᠢ᠂ ᠬᠡᠨ ᠲᠠᠢ ᠪᠠᠨ ᠨᠣᠣᠷᠠᠯᠳᠤᠭᠠᠳ ᠶᠠᠪᠤᠵᠤ ᠪᠠᠶᠢᠭᠠ ᠶᠤᠮ︖ ᠪᠠᠰᠠ ᠠᠯᠢ ᠠᠪᠤ ᠨᠠᠷ ᠴᠢᠨᠢ | ᠢᠷᠡᠭᠡᠳ ᠲᠠᠭᠠᠵᠦ ᠳᠡᠷᠪᠡᠭᠡ ᠪᠣᠯ︖ ᠭᠡᠳ ᠡᠬᠡᠨᠡᠷ ᠨᠢᠭᠡ ᠡᠳᠦᠷ ᠭᠠᠷᠤᠳᠢ ᠶᠢᠨ ᠨᠢᠳᠦᠯᠡᠵᠦ ᠠᠭᠰᠤᠷᠤᠯᠠ᠃ | - ᠣᠷᠣᠨ ᠤ ᠲᠥᠪ ᠠᠴᠠ ᠰᠤᠷᠪᠤᠯᠵᠢᠯᠠᠬᠴᠢ ᠢᠷᠡᠭᠡᠳ ᠪᠢ ᠬᠤᠲᠠᠨ ᠳᠣᠲᠣᠷᠠ ᠳᠠᠭᠠᠭᠤᠯᠤᠨ ᠰᠣᠷᠪᠤᠯᠵᠢᠯᠠᠭᠠ ᠠᠪᠴᠤ ᠁ ᠭᠡᠳ ᠯᠡ | ᠥᠩᠭᠡᠷᠡᠭᠦᠯᠦᠯᠡ᠃ ᠦᠨᠡᠨᠳᠡᠭᠡᠨ ᠰᠤᠷᠪᠤᠯᠵᠢᠯᠠᠬᠴᠢ ᠢᠷᠡᠭᠰᠡᠨ ᠦᠶᠡ ᠳᠤ ᠪᠢ ᠠᠯᠢ ᠴᠢᠳᠠᠬᠤ ᠪᠠᠷ ᠪᠤᠯᠲᠠᠵᠤ ᠪᠠᠶᠢᠳᠠᠭ ᠬᠥᠮᠥᠨ ᠪᠢᠯᠡ᠃ ᠦᠨᠡᠨᠳᠡᠭᠡᠨ ᠪᠢ ᠴᠢᠨᠢ | ᠮᠤᠵᠢᠶᠠᠩ ᠡᠷᠢᠭᠡᠳ ᠭᠦᠶᠦᠵᠦ ᠪᠠᠶᠢᠭᠰᠠᠨ ᠳ᠋ᠠ᠃ ᠵᠢᠷᠤᠭ ᠲᠥᠯᠥᠪᠯᠡᠭᠡ ᠠᠪᠬᠤ ᠭᠡᠵᠦ᠂ ᠥᠪᠡᠷ ᠤᠨ ᠪᠤᠳᠤᠬᠰᠠᠨ ᠢᠶᠠᠨ ᠣᠶᠢᠯᠠᠭᠠᠭᠤᠯᠬᠤ ᠭᠡᠵᠦ ᠪᠢ ᠬᠢᠲᠠᠳ | ᠮᠤᠵᠢᠶᠠᠩ ᠤᠳ ᠲᠠᠢ ᠭᠡᠯᠡ ᠠᠮᠠ ᠪᠠᠨ ᠬᠤᠭᠤᠯᠤᠮᠠᠷ ᠪᠣᠯᠵᠤ ᠭᠠᠴᠢᠭᠳᠠᠨᠠ᠃ ᠠᠷᠭᠠ ᠪᠠᠨ ᠪᠠᠷᠠᠬᠤ ᠳᠠᠭᠠᠨ ᠡᠬᠡᠨᠡᠷ ᠤᠨ ᠢᠶᠠᠨ ᠣᠷᠣᠢ ᠶᠢᠨ ᠬᠢᠴᠢᠶᠡᠯ ᠲᠠᠢ ᠨᠢᠭᠡ | ᠣᠷᠣᠢ ᠶᠢ ᠨᠢ ᠲᠠᠭᠠᠷᠠᠭᠤᠯᠵᠦ ᠬᠢᠲᠠᠳ ᠮᠤᠵᠢᠶᠠᠩ ᠢ ᠭᠡᠷ ᠲᠡᠭᠡᠨ ᠤᠷᠢᠭᠠᠳ ᠰᠡᠮᠡᠭᠡᠷ ᠬᠡᠷᠡᠮ ᠬᠠᠨᠠ ᠪᠠᠨ ᠬᠡᠮᠵᠢᠭᠦᠯᠦᠯᠡ᠂ ᠵᠢᠷᠤᠭᠤᠯᠤᠯᠠ᠃ | - ᠭᠤᠷᠪᠠᠨ ᠨᠣᠮ ᠠᠪᠴᠤ ᠥᠭᠬᠦ ᠦᠭᠡᠢ ᠪᠣᠯ ᠪᠢ ᠡᠵᠢ ᠳᠤ ᠬᠡᠯᠡᠨᠡ ᠭᠡᠵᠦ ᠮᠠᠭᠤ ᠥᠬᠢᠨ ᠨᠠᠮᠠ ᠪᠠᠨ ᠠᠶᠤᠯᠭᠠᠨᠠ᠃ ᠺᠢᠨᠣ᠋ ᠳᠡᠭᠡᠷᠡᠬᠢ ᠨᠢᠭᠤᠴᠠ | ᠨᠠᠮ ᠤᠨ ᠠᠵᠢᠯ ᠬᠢᠳᠡᠭ ᠰᠢᠭ ᠪᠢ ᠴᠢᠨᠢ ᠮᠡᠷᠭᠡᠵᠢᠯ ᠤᠨ ᠲᠣᠭᠯᠠᠭᠴᠢ ᠰᠢᠤᠬᠠᠨ ᠪᠠᠶᠢᠨᠠ ᠳ᠋ᠠ᠃ ᠬᠤᠶᠠᠷ ᠨᠣᠮ ᠴᠦ ᠭᠠᠶᠢᠭᠤᠢ ᠬᠡᠷᠡᠭ᠃ ᠬᠤᠶᠠᠷ ᠮᠢᠩᠭᠠᠨ | ᠨᠣᠮ ᠢᠶᠠᠨ ᠬᠢᠬᠦ ᠭᠠᠵᠠᠷ ᠲᠠᠢ ᠪᠣᠯᠣᠨᠠ ᠭᠡᠵᠦ ᠵᠢᠳᠬᠦᠭᠡ ᠶᠤᠮ ᠠ᠋ ᠪᠢ᠃ | ᠲᠦᠮᠡᠨ ᠬᠡᠷᠡᠭ ᠪᠦᠷᠢᠯᠳᠦᠵᠦ ᠭᠠᠭᠴᠠ ᠯᠡ ᠡᠬᠡᠨᠡᠷ ᠤᠨ ᠢᠶᠠᠨ ᠵᠤᠨ ᠤ ᠠᠮᠠᠷᠠᠯᠲᠠ ᠶᠢᠨ ᠵᠤᠭᠠᠯᠠᠬᠤ ᠴᠠᠭ ᠢ ᠬᠦᠯᠢᠶᠡᠵᠦ ᠰᠠᠭᠤᠯᠠ᠃ ᠪᠠᠭᠰᠢᠨᠠᠷ ᠭᠤᠷᠪᠠᠨ | ᠵᠢᠯ᠂ ᠠᠴᠢᠶᠠᠨ ᠤ ᠲᠡᠮᠡᠭᠡ ᠬᠥᠯᠦᠰᠢᠨ ᠦᠬᠡᠷ ᠰᠢᠭ ᠵᠢᠳᠬᠦᠭᠰᠡᠭᠡᠷ ᠪᠠᠶᠢᠵᠤ᠂ ᠳᠡᠭᠡᠳᠦ ᠭᠤᠷᠪᠠ ᠪᠠᠨ ᠲᠡᠭᠦᠰᠬᠡᠭᠰᠡᠭᠡᠷ ᠰᠤᠷᠭᠠᠭᠤᠯᠢ ᠠᠴᠠ ᠵᠣᠭᠤᠰ ᠭᠠᠷᠭᠠᠵᠤ ᠨᠢᠭᠡ | ᠭᠠᠵᠠᠷ ᠣᠯᠵᠤ ᠲᠣᠭᠤᠷᠢᠭᠤᠯᠳᠠᠭ᠃ ᠬᠦᠰᠡᠨ ᠬᠦᠯᠢᠶᠡᠵᠦ ᠪᠠᠶᠢᠲᠠᠯᠠ ᠨᠢ ᠭᠦᠷᠦᠭᠡᠳ ᠢᠷᠡᠪᠡ ᠲᠡᠷᠡ ᠡᠳᠦᠷ ᠨᠢ᠃ | ᠡᠬᠡᠨᠡᠷ ᠤᠨ ᠰᠠᠭᠤᠭᠰᠠᠨ ᠲᠡᠷᠭᠡ ᠰᠤᠷᠭᠠᠭᠤᠯᠢ ᠶᠢᠨ ᠡᠭᠦᠳᠡᠨ ᠠᠴᠠ ᠭᠦᠳᠡᠯᠪᠡᠤ ᠦᠭᠡᠢ ᠤᠤ᠂ ᠪᠢ ᠴᠢᠨᠢ᠂ ᠮᠤᠵᠢᠶᠠᠩ ᠢᠶᠠᠨ ᠳᠠᠭᠤᠳᠠᠭᠠᠳ ᠶᠠᠭᠠᠷᠠᠯᠠ᠃ | ᠵᠢᠷᠤᠭ ᠲᠥᠯᠥᠪᠯᠡᠭᠡ ᠶᠢ ᠨᠢ ᠰᠢᠷᠭᠠᠭᠠᠵᠤ᠂ ᠬᠥᠯᠥᠰᠦᠨ ᠮᠥᠩᠭᠦ ᠶᠢ ᠨᠢ ᠬᠤᠶᠠᠷ ᠮᠢᠩᠭᠠ ᠲᠠᠪᠤᠨ ᠵᠠᠭᠤ ᠪᠠᠷ ᠬᠡᠯᠡᠯᠴᠡᠨ ᠲᠣᠭᠲᠠᠵᠤ᠂ ᠬᠡᠷᠡᠭᠰᠡᠬᠦ ᠮᠣᠳᠣᠨ | ᠮᠠᠲ᠋ᠧᠷᠢᠶᠠᠯ ᠤᠨ ᠲᠤᠭᠠ ᠶᠢ ᠨᠢ ᠠᠰᠠᠭᠤᠵᠤ ᠥᠭᠡᠷᠡ ᠬᠡᠷᠡᠭᠰᠡᠬᠦ ᠵᠦᠢᠯ ᠤᠳ ᠢ ᠨᠢ ᠪᠦᠭᠦᠨ ᠢ ᠪᠦᠷᠢᠳᠬᠡᠵᠦ᠂ ᠠᠵᠢᠯ ᠤᠨ ᠵᠠᠪᠰᠠᠷ ᠲᠠᠲᠠᠬᠤ ᠲᠠᠮᠠᠬᠢ ᠶᠢ ᠨᠢ | ᠭᠦᠷᠳᠡᠯᠡ ᠪᠡᠯᠡᠳᠬᠡᠭᠡᠳ ᠠᠮᠵᠢᠯᠠ᠃ ᠶᠠᠷᠢᠶᠠᠨ ᠦᠭᠡᠢ᠂ ᠥᠬᠢᠨ ᠢᠶᠠᠨ ᠬᠠᠭᠤᠷᠴᠤ ᠪᠠᠶᠢᠭᠠᠳ ᠬᠤᠶᠠᠭᠤᠯᠠ ᠪᠠᠨ ᠰᠠᠶ᠋ᠢᠬᠢ ᠥᠷᠥᠭᠡᠨ ᠤ ᠵᠦᠢᠯ ᠤᠳ ᠢᠶᠠᠨ ᠪᠦᠭᠦᠨ ᠢ | ᠨᠦᠭᠦᠭᠡ ᠦᠷᠦᠭᠡ ᠨᠦᠭᠦᠳ ᠢᠶᠠᠷ ᠢᠶᠠᠨ ᠣᠷᠣᠭᠤᠯᠵᠤ ᠲᠠᠯᠪᠢᠯᠠ᠃ ᠮᠠᠷᠭᠠᠰᠢ ᠨᠢ ᠢᠷᠡᠬᠦ ᠪᠠᠷ ᠪᠣᠯᠵᠣᠭᠰᠠᠨ ᠮᠤᠵᠢᠶᠠᠩ ᠦᠳᠡ ᠥᠩᠭᠡᠷᠡᠭᠡᠳ ᠮᠥᠨ ᠪᠠᠷᠠ ᠦᠭᠡᠢ᠃ | ᠣᠴᠢᠭᠠᠳ ᠦᠵᠡᠬᠦ ᠳᠤ ᠦᠢᠯᠡᠳᠬᠡᠯ ᠳᠡᠭᠡᠨ ᠠᠯᠠᠭᠠ᠃ ᠤᠲᠠᠰᠤ ᠶᠢ ᠨᠢ ᠠᠪᠬᠤ ᠳᠤ ᠵᠠᠯᠭᠠᠭᠳᠠᠬᠤ ᠦᠭᠡᠢ᠃ ᠬᠤᠶᠠᠷ ᠭᠤᠷᠪᠠ ᠬᠤᠨᠣᠭᠠᠳ ᠰᠠᠶ᠋ᠢ ᠨᠢᠭᠡ ᠤᠳᠠᠭᠠ | ᠵᠠᠯᠭᠠᠭᠳᠠᠯᠠ ᠳ᠋ᠧ᠃ | - ᠨᠥᠬᠦᠷ ᠴᠢ ᠶᠠᠭᠤ ᠬᠢᠵᠦ ᠪᠠᠶᠢᠬᠤ ᠶᠤᠮ︖ | - ᠬᠥᠳᠡᠭᠡ ᠳᠤ ᠡᠭᠦᠳᠡ ᠴᠣᠩᠬᠤ ᠬᠢᠭᠡᠳ ᠶᠠᠭᠠᠷᠠᠤ ᠪᠠᠶᠢᠨᠠ ᠭᠡᠨᠡ᠃ ᠵᠣᠯᠢᠭ ᠴᠢᠨᠢ ᠠᠷᠪᠠ ᠶᠢ ᠪᠦᠷᠬᠦᠭᠦᠯᠬᠦ ᠠᠵᠢᠯ ᠠᠴᠠ ᠨᠢᠭᠡ ᠠᠶᠢᠯ ᠢ ᠣᠯᠴᠢᠬᠠᠵᠤ | ᠠᠬᠠ ᠶᠢᠨ ᠢᠶᠠᠨ ᠤᠴᠢᠷ ᠢ ᠠᠷᠤ ᠲᠤᠬᠤᠨ ᠳᠠᠭᠠᠨ ᠮᠠᠷᠲᠠᠭᠰᠠᠨ ᠪᠠᠶᠢᠨᠠ᠃ | - ᠲᠡᠭᠡᠭᠡᠳ ᠮᠢᠨᠤ ᠭᠡᠷ ᠤᠨ ᠠᠵᠢᠯ ᠢ ᠶᠠᠭᠠᠬᠢᠨᠠᠮ︖ | - ᠠᠬᠠ ᠲᠠᠨ ᠢ ᠶᠠᠭᠠᠷᠠᠵᠤ ᠦᠭᠡᠢ ᠪᠠ ᠭᠡᠳ ᠪᠤᠳᠤᠵᠦ ᠁ ᠭᠡᠨᠡ᠃ | - ᠡᠴᠢᠭᠡ ᠴᠢᠨᠢ᠂ ᠪᠢ ᠶᠠᠭᠠᠷᠠᠬᠤ ᠦᠭᠡᠢ ᠪᠠᠶᠢᠭᠰᠠᠨ ᠶᠤᠮ ᠪᠣᠯ ᠰᠣᠯᠢᠶᠠ ᠣᠷᠣᠭᠠᠳ ᠴᠢᠮᠠᠶᠢ ᠰᠥᠨᠢ ᠳᠦᠯᠢ ᠪᠠᠷ ᠭᠡᠷ ᠲᠡᠭᠡᠨ ᠵᠠᠯᠠᠵᠤ ᠁ ᠭᠡᠵᠦ | ᠬᠤᠷᠣᠰᠤᠨ ᠪᠤᠳᠤᠭᠠᠳ ᠡᠯᠵᠢᠭᠡᠨ ᠠᠭᠠᠰᠢ ᠮᠢᠨᠢ ᠬᠥᠳᠡᠯᠵᠦ ᠤᠲᠠᠰᠤ ᠪᠠᠨ ᠬᠤᠸᠠᠰ ᠬᠢᠲᠡᠯᠡ ᠬᠠᠭᠠᠯᠠ᠃ ᠵᠣᠭᠤᠰ ᠦᠵᠡᠪᠡᠯ ᠵᠢᠷᠤᠭᠠᠯᠠᠳᠠᠭ ᠶᠢᠷᠲᠢᠨᠴᠦ ᠬᠤᠶᠢᠨᠠ᠂ | ᠶᠡᠭᠡ ᠵᠣᠭᠤᠰ ᠦᠵᠡᠭᠡᠳ ᠯᠡ ᠪᠠᠭᠠ ᠵᠣᠭᠤᠰ ᠢᠶᠠᠨ ᠬᠠᠶᠠᠭᠰᠠᠨ ᠵᠣᠯᠢᠭ᠃ | ᠠᠷᠭᠠ ᠪᠤᠰᠤ ᠮᠣᠳᠣᠨ ᠮᠠᠲ᠋ᠧᠷᠢᠶᠠᠯ ᠪᠣᠷᠣᠯᠠᠭᠤᠯᠳᠠᠭ ᠰᠤᠷᠤᠬᠴᠢ ᠶᠢᠨ ᠢᠶᠠᠨ ᠳᠡᠯᠭᠡᠭᠦᠷ ᠲᠤ ᠭᠦᠷᠦᠯᠡ᠃ ᠲᠡᠭᠡᠭᠡᠳ ᠨᠢᠭᠡ ᠨᠣᠮ ᠤᠨ ᠵᠢᠶᠠᠵᠠ ᠬᠢᠯᠭᠡᠬᠦ | ᠭᠡᠵᠦ ᠪᠠᠶᠢᠭᠠ ᠪᠠᠨ ᠢᠯᠡᠷᠬᠡᠶᠢᠯᠡᠵᠦ᠂ ᠮᠠᠲ᠋ᠧᠷᠢᠶᠠᠯ ᠢ ᠨᠢ ᠠᠪᠬᠤ ᠶᠢᠨ ᠳᠠᠭᠠᠤ ᠲᠠᠨᠢᠯ ᠮᠤᠵᠢᠶᠠᠩ ᠪᠠᠶᠢᠪᠠᠯ ᠬᠠᠷᠢᠴᠠᠭᠠᠳ ᠥᠭᠬᠦ ᠶᠢ ᠨᠠᠶᠢᠳᠠᠪᠠᠯ᠄ ︽ᠮᠠᠨᠤᠰ ᠤᠨ | ᠵᠠᠷᠤᠳᠠᠭ ᠮᠤᠵᠢᠶᠠᠩ ᠡᠳᠦᠷ ᠲᠡᠭᠡᠨ ᠪᠣᠯ ᠪᠦᠷ ᠬᠢᠭᠡᠳ ᠪᠠᠷᠠᠬᠤ ᠦᠭᠡᠢ ᠠᠵᠢᠯ ᠲᠠᠢ ᠪᠠᠶᠢᠨᠠ᠂ ᠬᠠᠷᠢᠨ ᠣᠷᠣᠢ ᠰᠥᠨᠢ ᠪᠠᠷ ᠬᠢᠵᠦ ᠪᠤᠯᠬᠤ ᠳᠤ ᠭᠦᠷᠪᠡᠯ ᠮᠠᠷᠭᠠᠰᠢ | ᠭᠡᠷ ᠲᠤ ᠴᠢᠨᠢ ᠣᠴᠢᠭᠠᠳ ᠬᠡᠮᠵᠢᠶᠡ ᠠᠪᠴᠤ ᠪᠣᠯᠣᠨᠠ︾ ᠭᠡᠯᠡ᠃ ᠬᠥᠯᠥᠰᠦᠨ ᠵᠣᠭᠤᠰ ᠢ ᠨᠢ ᠪᠤᠳᠤᠵᠦ ᠦᠵᠡᠪᠡᠯ ᠥᠨᠥᠬᠢ ᠬᠥᠳᠡᠭᠡ ᠶᠠᠪᠤᠭᠰᠠᠨ | ᠮᠤᠵᠢᠶᠠᠩ ᠠᠴᠠ ᠪᠠᠨ ᠪᠠᠰᠠ ᠬᠢᠮᠳᠠᠬᠠᠨ ᠲᠤᠯᠠ ᠪᠠᠷᠤᠭ ᠲᠥᠯᠥᠪ ᠪᠣᠯᠤᠮᠠᠷ ᠰᠠᠨᠠᠭᠳᠠᠪᠠ᠃ ᠭᠡᠲᠡᠯᠡ ᠴᠠᠭ ᠤᠨ ᠲᠠᠯᠠ ᠪᠠᠷ ᠡᠬᠡᠨᠡᠷ ᠢ ᠢᠷᠡᠳᠡᠯᠡ ᠪᠠᠷᠠᠵᠤ ᠲᠡᠶᠢᠯᠭᠦ | ᠦᠭᠡᠢ ᠠᠶᠤᠯ ᠲᠠᠢ ᠲᠤᠯᠠ ᠣᠷᠣᠢ ᠪᠣᠯᠣᠭᠠᠳ ᠴᠢᠮᠡᠭᠡ ᠦᠭᠭᠦᠶᠡ ᠭᠡᠵᠦ ᠬᠡᠯᠡᠭᠡᠳ ᠥᠭᠡᠷᠡ ᠭᠠᠵᠠᠷ ᠤᠳ ᠢᠶᠠᠷ ᠮᠥᠨ ᠦᠵᠡᠬᠦ ᠰᠠᠨᠠᠭᠠᠲᠠᠢ ᠬᠤᠯᠬᠢᠵᠤ ᠭᠠᠷᠴᠤ | ᠢᠷᠡᠯᠡ᠃ ᠲᠡᠭᠡᠭᠡᠳ ᠰᠠᠶ᠋ᠢᠬᠠᠨ ᠵᠣᠴᠢᠳ ᠤᠨ ᠪᠠᠭᠤᠳᠠᠯ ᠡᠷᠭᠢᠯᠡᠭᠰᠡᠨ ᠨᠠᠶᠢᠵᠠ ᠬᠦᠷᠡᠯᠰᠦ᠋ᠬᠡ ᠶᠢᠨ ᠵᠠᠬᠠ ᠳᠤ ᠣᠴᠢᠪᠠ᠃ ᠮᠤᠵᠢᠶᠠᠩ ᠡᠷᠢᠵᠦ ᠥᠭᠬᠦ ᠶᠢ ᠭᠤᠶᠤᠪᠠᠯ᠄ | ︽ᠮᠤᠵᠢᠶᠠᠩ ᠴᠤ ᠪᠣᠯ ᠪᠠᠶᠢᠨᠠ ᠰᠢᠤ᠂ ᠵᠣᠯᠢᠭ ᠤᠳ ᠴᠢᠨᠢ ᠠᠵᠢᠯ ᠠᠷᠪᠢᠨ ᠪᠣᠯᠣᠭᠠᠳ ᠠᠪᠬᠤ ᠬᠥᠯᠥᠰᠦ ᠨᠢ ᠳᠠᠩᠴᠤ ᠦᠨᠡᠲᠡᠢ ᠪᠠᠶᠢᠭᠠᠳ ᠪᠠᠶᠢᠬᠤ ᠶᠤᠮ︾ ᠭᠡᠵᠦ | ᠰᠡᠷᠡᠮᠵᠢᠯᠡᠭᠦᠯᠪᠡ᠃ ᠪᠢ ᠨᠢᠭᠡ ᠬᠤᠶᠠᠷ ᠲᠠᠢ ᠨᠢ ᠬᠠᠷᠢᠴᠠᠵᠤ ᠦᠵᠡᠬᠦ ᠶᠢ ᠰᠠᠨᠠᠪᠠᠯ ︽ᠪᠣᠯᠤᠯᠭᠦᠢ︾ ᠭᠡᠳ ᠨᠠᠳᠠ ᠬᠤᠶᠠᠷ ᠮᠤᠵᠢᠶᠠᠩ ᠤᠨ ᠨᠡᠷᠡ ᠶᠢᠨ ᠬᠠᠭᠤᠳᠠᠰᠤ | ᠭᠠᠷᠳᠠᠭᠤᠯᠵᠠᠢ᠃ ᠤᠲᠠᠰᠤᠳᠠᠪᠠᠯ ᠨᠢᠭᠡ ᠨᠢ ᠪᠠᠰᠠ ᠬᠥᠳᠡᠭᠡ ᠶᠠᠪᠤᠭᠰᠠᠨ ᠪᠠᠶᠢᠯᠠ᠃ ᠨᠦᠭᠦᠭᠡ ᠨᠢᠭᠡ ᠨᠢ ᠦᠳᠡ ᠶᠢᠨ ᠠᠯᠳᠠ ᠪᠠᠷ ᠭᠡᠷ ᠲᠤ ᠢᠷᠡᠵᠦ ᠦᠵᠡᠬᠦ ᠪᠠᠷ | ᠲᠣᠬᠢᠷᠠᠯᠴᠠᠪᠠ᠃ ᠦᠳᠡ ᠶᠢᠨ ᠬᠤᠶᠢᠨᠠ ᠪᠣᠯᠣᠭᠠᠳ ᠭᠦᠷᠦᠭᠡᠳ ᠢᠷᠡᠯᠡ᠃ ᠠᠵᠢᠯ ᠤᠨ ᠬᠠᠨᠢ ᠪᠠᠨ ᠭᠡᠳ ᠪᠠᠰᠠ ᠬᠤᠶᠠᠷ ᠬᠥᠮᠥᠨ ᠳᠠᠭᠠᠭᠤᠯᠴᠢᠬᠠᠭᠰᠠᠨ᠂ ᠪᠦᠭᠦ | ᠠᠵᠢᠯ ᠢ ᠰᠣᠨᠣᠰᠴᠤ ᠪᠠᠷᠠᠭᠠᠳ ᠤᠷᠤᠭᠤᠯ ᠨᠢ ᠢᠷᠪᠠᠶᠢᠭᠠᠳ ᠶᠠᠪᠤᠴᠢᠬᠠᠪᠠ᠃ ᠲᠡᠳᠡ ᠪᠤᠳᠤᠬᠤ ᠳᠠᠭᠠᠨ ᠰᠢᠨᠡ ᠭᠡᠷ ᠠᠪᠤᠭᠰᠠᠨ ᠬᠥᠮᠥᠨ ᠭᠡᠷ ᠢᠶᠠᠨ ᠴᠢᠮᠡᠭᠯᠡᠬᠦ ᠪᠠᠷ | ᠪᠠᠶᠢᠨᠠ ᠭᠡᠵᠦ ᠪᠤᠳᠤᠵᠦ ᠭᠡᠨᠡ᠃ ᠡᠶᠢᠮᠦ ᠵᠢᠭᠠᠬᠠᠨ ᠠᠳᠠᠯ ᠢ ᠪᠣᠯ ᠲᠤᠰᠬᠤ ᠴᠢᠯᠦᠭᠡ ᠦᠭᠡᠢ ᠨᠢ ᠢᠯᠡᠷᠬᠡᠢ᠃ ᠲᠡᠭᠡᠴᠢᠬᠡᠭᠡᠳ ᠬᠡᠳᠦᠢ ᠬᠠᠩᠰᠢ ᠪᠠᠷ ᠬᠢᠯᠭᠡᠬᠦ | ᠰᠠᠨᠠᠭᠠᠲᠠᠢ ᠶᠤᠮ︖ ᠭᠡᠵᠦ ᠠᠰᠠᠭᠤᠨᠠ᠃ ᠪᠢ ᠬᠤᠶᠠᠳᠠᠭᠢ ᠮᠤᠵᠢᠶᠠᠩ ᠤᠨ ᠬᠠᠩᠰᠢ ᠠᠴᠠ ᠬᠤᠶᠠᠷ ᠵᠠᠭᠤ ᠲᠠᠲᠠᠭᠤ ᠪᠠᠷ ᠬᠡᠯᠡᠭᠡᠳ ᠠᠪᠤᠭᠰᠠᠨ ᠴᠢᠨᠢ ᠢᠲᠡᠭᠡᠬᠦ | ᠦᠭᠡᠢ ᠮᠠᠶ᠋ᠢᠭᠲᠠᠢ ᠨᠢᠳᠦ ᠭᠤᠷᠪᠠᠯᠵᠢᠯᠠᠵᠤ᠄ ︽ᠶᠠᠭᠤ ᠭᠡᠨᠡ︖ ᠮᠢᠩᠭᠠ ᠨᠠᠢᠮᠠᠨ ᠵᠠᠭᠤ ᠭᠡᠨᠡ︖ ᠲᠠ ᠭᠤᠷᠪᠠᠨ ᠮᠢᠩᠭᠠ ᠥᠭᠭᠦᠭᠡᠳ ᠪᠢᠳᠡ ᠪᠠᠰᠠ ᠬᠢᠬᠦ ᠴᠢᠯᠦᠭᠡ | ᠦᠭᠡᠢ ᠰᠢᠤ︾ ᠭᠡᠳ ᠡᠭᠦᠳᠡ ᠰᠠᠪᠠᠨ ᠭᠠᠷᠴᠤ ᠶᠠᠪᠤᠪᠠ᠃ | ᠵᠠ ᠶᠡᠷᠦᠨᠢ ᠥᠭᠡᠷᠡ ᠡᠷᠢᠬᠦ ᠶᠢ ᠪᠣᠯᠢᠶᠠ ᠭᠡᠳ ᠰᠠᠨᠳᠤᠷᠤᠨ ᠮᠣᠳᠣᠨ ᠮᠠᠲ᠋ᠧᠷᠢᠶᠠᠯ ᠬᠤᠳᠠᠯᠳᠤᠳᠠᠭ ᠰᠤᠷᠤᠬᠴᠢ ᠶᠢᠨ ᠵᠠᠬᠠ ᠳᠠᠭᠠᠨ ᠬᠠᠲᠠᠷᠢᠭᠤᠯᠤᠭᠠᠳ | ᠭᠦᠷᠦᠯᠡ᠃ ᠰᠠᠶ᠋ᠢᠬᠢ ᠮᠤᠵᠢᠶᠠᠩ ᠮᠥᠨ ᠠᠵᠢᠯ ᠲᠠᠢ ᠪᠣᠯᠴᠢᠬᠠᠵᠤ᠂ ᠥᠭᠡᠷᠡ ᠨᠢᠭᠡ ᠬᠡᠯᠡᠯᠴᠡᠭᠡᠳ ᠥᠭᠭᠦᠭᠰᠡᠨ ᠨᠢ ᠲᠥᠯᠥᠪᠯᠡᠭᠰᠡᠨ ᠵᠢᠷᠤᠭ ᠢ ᠦᠵᠡᠵᠦ ᠪᠠᠷᠠᠭᠠᠳ᠄ | ︽ᠴᠢᠨᠦ ᠡᠨᠡ ᠠᠵᠢᠯ ᠭᠤᠷᠪᠠᠨ ᠡᠳᠦᠷ ᠲᠤ ᠪᠠᠷᠠᠬᠤ ᠪᠠᠷ ᠠᠵᠢᠯ ᠪᠠᠶᠢᠨᠠ᠃ ᠬᠥᠯᠥᠰᠦᠨ ᠮᠥᠩᠭᠦ ᠬᠤᠶᠠᠷ ᠮᠢᠩᠭᠠ ᠵᠢᠷᠭᠤᠭᠠᠨ ᠵᠠᠭᠤ ᠣᠷᠴᠢᠮ ᠭᠦᠷᠦᠨᠡ᠂ | ᠰᠤᠷᠤᠬᠴᠢ ᠶᠢᠨ ᠴᠢᠨᠢ ᠨᠢᠭᠤᠷ ᠢ ᠬᠠᠷᠠᠭᠠᠳ ᠬᠤᠶᠠᠷ ᠮᠢᠩᠭᠠ ᠪᠠᠷ ᠬᠢᠵᠦ ᠦᠭᠭᠦᠶᠡ᠂ ᠪᠢ ᠪᠠᠷᠤᠭ ᠯᠡ ᠴᠢᠮᠠᠳᠤ ᠵᠦᠭᠡᠷ ᠬᠢᠵᠦ ᠥᠭᠴᠦ ᠪᠠᠶᠢᠭᠠ ᠲᠠᠢ ᠠᠳᠠᠯᠢ ᠰᠢᠤ︾ | ᠭᠡᠯᠡ᠃ ︽ᠬᠤᠶᠠᠷ ᠮᠢᠩᠭᠠ ᠪᠣᠯ ᠬᠤᠶᠠᠷ ᠮᠢᠩᠭᠠ᠃ ᠴᠠᠭ ᠲᠠᠭᠠᠨ ᠪᠠᠷᠠᠪᠠᠯ ᠪᠣᠯᠴᠢᠬᠠᠨᠠ︾ᠭᠡᠪᠡᠯ᠄ ︽ᠡᠷᠲᠡ ᠣᠷᠣᠢ ᠳᠠᠭᠠᠨ ᠪᠦᠷ ᠬᠢᠨᠡ᠂ ᠲᠠᠪᠤᠨ ᠡᠳᠦᠷ ᠲᠤ | ᠪᠦᠭᠦᠨ ᠢ ᠪᠠᠷᠠᠭᠠᠨᠠ︾ ᠭᠡᠪᠡ᠃ ᠲᠡᠭᠡᠭᠡᠳ ᠵᠢᠷᠤᠭ ᠲᠥᠰᠥᠪ ᠢ ᠳᠠᠬᠢᠨᠲᠠ ᠶᠠᠷᠢᠯᠴᠠᠵᠤ᠂ ᠭᠡᠷ ᠲᠤ ᠢᠷᠡᠵᠦ ᠬᠡᠮᠵᠢᠶᠡ ᠶᠢ ᠨᠢ ᠠᠪᠤᠭᠠᠳ ᠬᠡᠷᠡᠭᠰᠡᠬᠦ ᠮᠣᠳᠣᠨ | ᠮᠠᠲ᠋ᠧᠷᠢᠶᠠᠯ ᠤᠨ ᠲᠤᠭᠠ ᠭᠠᠷᠭᠠᠪᠠ᠃ | ᠬᠤᠶᠠᠷ ᠡᠳᠦᠷ ᠪᠣᠯᠣᠭᠠᠳ ᠴᠢᠮᠡᠭᠡ ᠦᠭᠡᠢ ᠲᠤᠯᠠ ᠮᠤᠵᠢᠶᠠᠩ ᠢ ᠡᠷᠢᠭᠡᠳ ᠣᠴᠢᠪᠠ᠃ ᠮᠤᠵᠢᠶᠠᠩ ᠨᠥᠬᠦᠷ ᠪᠠᠶᠢᠭᠰᠠᠨ ᠦᠭᠡᠢ᠂ ᠮᠣᠳᠣᠨ ᠮᠠᠲ᠋ᠧᠷᠢᠶᠠᠯ | ᠬᠤᠳᠠᠯᠳᠤᠳᠠᠭ ᠰᠤᠷᠤᠬᠴᠢ ᠮᠢᠨᠢ᠄ ︽ᠬᠤᠷᠭᠤ ᠪᠠ ᠨᠣᠮ ᠤᠨ ᠵᠢᠶᠠᠵᠠ ᠶᠢ ᠴᠢᠨᠢ ᠪᠦᠷ ᠵᠦᠰᠦᠭᠡᠳ ᠪᠠᠷᠠᠭᠰᠠᠨ᠂ ᠬᠡᠷᠪᠡ ᠣᠷᠣᠢ ᠭᠡᠷ ᠲᠡᠭᠡᠨ ᠬᠥᠮᠥᠨ ᠲᠠᠢ ᠪᠣᠯ ᠡᠨᠡ | ᠣᠷᠣᠢ ᠳᠠᠷᠤᠢ ᠭᠡᠷ ᠲᠤ ᠴᠢᠨᠢ ᠣᠴᠢᠵᠤ ᠬᠡᠷᠡᠮ ᠳᠡᠭᠡᠷᠡ ᠴᠢᠨᠢ ᠬᠠᠳᠠᠵᠦ ᠦᠭᠭᠦᠶᠡ︾ ᠭᠡᠯᠡ᠃ ︽ᠫᠢᠱ ᠲᠠᠱ ᠫᠢᠱ ᠲᠠᠱ ᠁︾ ᠬᠠᠳᠠᠭᠠᠰᠤᠨ ᠫᠤᠤ ᠶᠢᠨ ᠲᠠᠭᠤᠨ | ᠴᠢᠬᠢᠨ ᠬᠡᠩᠭᠡᠷᠭᠡ ᠶᠢ ᠳᠡᠯᠡᠳᠦᠭᠡᠳ ᠲᠡᠰᠬᠦ ᠦᠭᠡᠢ ᠲᠤᠯᠠ ᠪᠢ ᠥᠬᠢᠨ ᠢᠶᠠᠨ ᠳᠠᠭᠠᠭᠤᠯᠤᠭᠠᠳ ᠭᠠᠳᠠᠭᠤᠷ ᠲᠣᠭᠤᠷᠢᠵᠤ᠂ ᠪᠠᠭᠠ ᠰᠠᠭᠠ ᠵᠢᠮᠢᠰ ᠪᠤᠭᠤᠷᠰᠤᠭ | ᠠᠪᠤᠭᠠᠳ ᠭᠡᠷ ᠲᠡᠭᠡᠨ ᠪᠤᠴᠠᠨ ᠢᠷᠡᠬᠦ ᠳᠤ ᠬᠤᠷᠭᠤᠨ ᠤ ᠶᠠᠩᠵᠤ ᠲᠥᠯᠥᠪ ᠨᠢ ᠨᠢᠭᠡᠨᠲᠡ ᠭᠠᠷᠴᠢᠬᠠᠭᠰᠠᠨ ᠪᠠᠶᠢᠯᠠ᠃ ᠮᠤᠵᠢᠶᠠᠩ ᠭᠤᠸᠠᠢ ᠬᠠᠳᠠᠭᠠᠰᠤᠯᠠᠬᠤ | ᠫᠤᠤ ᠶᠢᠨ ᠢᠶᠠᠨ ᠴᠠᠭᠢᠯᠭᠠᠨ ᠤᠲᠠᠰᠤ ᠶᠢ ᠰᠤᠭᠤᠯᠵᠤ᠄ ︽ᠮᠠᠷᠭᠠᠰᠢ ᠥᠷᠯᠥᠭᠡ ᠡᠷᠲᠡ ᠢᠷᠡᠵᠦ ᠬᠠᠭᠠᠯᠭᠠ ᠶᠢ ᠨᠢ ᠲᠠᠭᠠᠷᠠᠭᠤᠯᠵᠦ ᠦᠭᠭᠦᠶᠡ︾ ᠭᠡᠳ ᠶᠠᠪᠤᠪᠠ᠃ | ᠪᠤᠷᠬᠠᠨ ᠠ᠋᠂ ᠮᠤᠵᠢᠶᠠᠩ ᠤᠨ ᠠᠳᠠᠯ ᠭᠡᠳᠡᠭ ᠴᠢᠨᠢ ᠪᠦᠷ ᠡᠶᠢᠮᠦ ᠪᠣᠯᠴᠢᠬᠠᠵᠤ ᠤᠤ ᠳ᠋ᠠ᠂ ᠨᠠᠮᠠᠶᠢ ᠪᠠᠭᠠ ᠪᠠᠶᠢᠬᠤ ᠳᠤ ᠬᠢᠷᠦᠭᠡ ᠪᠠᠷ ᠮᠣᠳᠣ ᠵᠦᠰᠦᠬᠦ᠂ ᠤᠭᠤᠯᠢ | ᠬᠠᠷᠤᠭᠤᠯ ᠢᠶᠠᠷ ᠴᠠᠪᠴᠢᠵᠤ ᠬᠠᠷᠤᠭᠤᠯᠳᠤᠬᠤ᠂ ᠴᠦᠴᠡ ᠪᠠᠷ ᠨᠦᠬᠡ ᠴᠤᠭᠤᠯᠬᠤ᠂ ᠴᠠᠪᠠᠤ ᠴᠢᠨᠠᠬᠤ ᠁ ᠭᠡᠳ ᠬᠡᠳᠦᠢ ᠴᠤ ᠲᠦᠪᠡᠭ ᠲᠠᠢ ᠮᠡᠷᠭᠡᠵᠢᠯ ᠤᠨ ᠠᠳᠠᠯ | ᠪᠠᠶᠢᠭᠰᠠᠨ ᠪᠢᠯᠡ ᠳ᠋ᠧ᠃ ᠡᠶᠢᠮᠦ ᠯᠡ ᠠᠮᠠᠷᠬᠠᠨ ᠲᠠᠭᠠᠷᠠᠭᠤᠯᠴᠢᠬᠠᠬᠤ ᠶᠢ ᠮᠡᠳᠡᠭᠰᠡᠨ ᠪᠣᠯ ᠪᠢ ᠥᠪᠡᠷ ᠢᠶᠠᠨ ᠬᠢᠴᠢᠬᠡᠪᠡᠴᠦ ᠴᠢᠳᠠᠮᠠᠷ ᠰᠢᠤᠬᠠᠨ ᠰᠠᠨᠠᠭᠳᠠᠪᠠ᠃ | ᠨᠣᠮ ᠤᠨ ᠬᠤᠷᠭᠤ ᠪᠠᠨ ᠵᠣᠬᠢᠶᠠᠵᠤ ᠪᠠᠷᠠᠲᠠᠯᠠ ᠭᠦᠭᠡᠬᠤᠳᠠ ᠳᠤ ᠬᠤᠷᠠᠯ ᠲᠠᠢ ᠪᠣᠯᠵᠤ ᠪᠢ ᠶᠠᠪᠤᠭᠠᠳ ᠦᠭᠭᠦᠯᠡ᠃ ᠬᠤᠷᠠᠯ ᠤᠨ ᠵᠠᠪᠰᠠᠷ ᠡᠬᠡᠨᠡᠷ ᠨᠣᠶᠠᠨ | ᠬᠠᠷᠢᠭᠠᠳ ᠢᠷᠡᠭᠰᠡᠭᠡᠷ ᠶᠠᠭᠠᠬᠢᠳᠠᠭ ᠪᠣᠯ ᠭᠡᠵᠦ ᠪᠢ ᠨᠢᠭᠡ ᠬᠤᠶᠠᠷ ᠤᠳᠠᠭᠠ ᠪᠤᠳᠤᠵᠦ ᠠᠮᠵᠢᠪᠠ᠃ ᠬᠠᠷᠢᠭᠠᠳ ᠢᠷᠡᠬᠦ ᠳᠤ ᠡᠬᠡ ᠥᠬᠢᠨ ᠬᠤᠶᠠᠷ ᠪᠦᠷ | ᠰᠤᠷᠭᠠᠭᠤᠯᠢ ᠳᠠᠭᠠᠨ ᠶᠠᠪᠤᠭᠠᠳ ᠪᠠᠶᠢᠪᠠ᠃ ᠪᠢ ᠨᠣᠮ ᠤᠨ ᠬᠤᠷᠭᠤ ᠪᠠᠨ ᠣᠷᠣᠵᠤ ᠦᠵᠡᠪᠡᠯ ᠪᠦᠷ ᠡᠮᠬᠢ ᠲᠢᠭ ᠲᠠᠢ ᠪᠣᠯᠭᠠᠭᠠᠳ ᠪᠠᠶᠢᠭᠠ ᠨᠢ ᠦᠵᠡᠭᠳᠡᠨᠡ᠃ | ᠭᠡᠷ ᠤᠨ ᠠᠲᠠᠷ ᠢ ᠲᠣᠭᠤᠷᠢᠭᠤᠯᠤᠨ ᠵᠣᠬᠢᠶᠠᠭᠰᠠᠨ ᠳᠡᠭᠦᠵᠢᠩ ᠬᠤᠷᠭᠤᠨ ᠳᠤ ᠢᠯᠡᠭᠦᠴᠡ ᠭᠦᠨᠵᠢᠯᠡ ᠳᠡᠪᠢᠰᠬᠡᠷ᠂ ᠬᠠᠶᠢᠷᠴᠠᠭ ᠲᠠᠢ ᠭᠤᠳᠤᠯ ᠬᠢᠵᠦ ᠳᠦᠭᠦᠷᠭᠡᠵᠡᠢ᠃ | ᠬᠤᠪᠴᠠᠰᠤᠨ ᠬᠤᠶᠠᠷ ᠬᠤᠷᠭᠤᠨ ᠳᠤ ᠡᠬᠡᠨᠡᠷ ᠪᠢᠳᠡ ᠬᠤᠶᠠᠷ ᠤᠨ ᠲᠦᠷᠪᠡᠨ ᠤᠯᠠᠷᠢᠯ ᠤᠨ ᠬᠤᠪᠴᠠᠰᠤ ᠪᠠᠨ ᠡᠯᠭᠦᠵᠡᠢ᠃ ᠥᠬᠢᠨ ᠳᠤ ᠵᠣᠬᠢᠶᠠᠭᠰᠠᠨ ᠣᠷᠣᠨ ᠳᠡᠭᠡᠷᠡ | ᠮᠢᠨᠤ ᠣᠷᠣ ᠶᠢ ᠲᠡᠭᠰᠢᠬᠡᠨ ᠬᠤᠷᠢᠶᠠᠵᠠᠢ᠃ ᠨᠣᠮ ᠤᠨ ᠬᠤᠷᠭᠤ ᠶᠢ ᠰᠢᠨᠵᠢᠯᠡᠵᠦ ᠦᠵᠡᠪᠡᠯ ᠡᠬᠡ ᠥᠬᠢᠨ ᠬᠤᠶᠠᠭᠤᠯᠠ ᠶᠢᠨ ᠨᠣᠮ ᠭᠤᠷᠪᠠᠨ ᠤ ᠬᠤᠶᠠᠷ ᠢᠯᠡᠭᠦᠦ ᠶᠢ | ᠡᠵᠡᠯᠡᠵᠦ᠂ ᠦᠨᠡᠮᠯᠡᠯ ᠮᠧᠲᠠᠯ ᠲᠠᠯᠪᠢᠨᠠ ᠭᠡᠰᠡᠨ ᠭᠠᠵᠠᠷ ᠨᠢ ᠪᠦᠷ ᠬᠠᠵᠢᠤᠬᠠᠢ ᠶᠢᠨ ᠬᠠᠶᠢᠷᠴᠠᠭ ᠪᠣᠯᠵᠤ ᠶᠡᠬᠡᠯᠡ ᠲᠠᠭᠠᠷᠠᠵᠠᠢ᠃ ᠬᠠᠷᠢᠨ ᠮᠢᠨᠤ ᠨᠣᠮ ᠤᠳ ᠤᠨ | ᠣᠯᠠᠩᠬᠢ ᠶᠢ ᠨᠢ ᠣᠷᠣᠨ ᠳᠣᠣᠭᠤᠷ ᠴᠢᠬᠢᠨ ᠣᠷᠣᠭᠤᠯᠵᠤ᠂ ᠤᠤᠯ ᠤᠨ ᠬᠡᠪ ᠢᠶᠠᠷ ᠢᠶᠠᠨ ᠴᠠᠭᠠᠰᠤᠨ ᠬᠠᠶᠢᠷᠴᠠᠭ ᠲᠠᠭᠠᠨ ᠨᠣᠶᠢᠷᠰᠤᠭᠰᠠᠭᠠᠷ ᠠᠪᠠᠢ᠃ | ᠬᠡᠳᠦᠨ ᠡᠳᠦᠷ ᠪᠣᠯᠣᠭᠠᠳ ᠪᠢ ᠥᠬᠢᠨ ᠲᠠᠢ ᠪᠠᠨ ᠵᠥᠪᠳᠡᠵᠦ᠄ ︽ᠴᠢᠨᠦ ᠬᠠᠮᠲᠤ ᠰᠤᠷᠤᠬᠴᠢ ᠴᠢᠨᠢ ᠪᠦᠷ ᠥᠪᠡᠷ ᠤᠨ ᠭᠡᠰᠡᠨ ᠤᠨᠲᠠᠬᠤ ᠦᠷᠦᠭᠡ ᠲᠠᠢ ᠰᠢᠤ᠂ | ᠠᠪᠤ ᠨᠢ ᠲᠡᠷᠡᠬᠦ ᠦᠷᠦᠭᠡ ᠶᠢ ᠴᠢᠮᠠᠳᠤ ᠵᠣᠬᠢᠶᠠᠵᠤ ᠥᠭᠭᠦᠭᠰᠡᠨ ᠶᠤᠮ᠂ ᠵᠤᠨ ᠤ ᠬᠠᠯᠠᠭᠤᠨ ᠳᠤ ᠲᠡᠷᠡ ᠦᠷᠦᠭᠡ ᠮᠠᠰᠢ ᠰᠡᠷᠢᠭᠦᠨ ᠰᠢᠤ᠂ ᠴᠢ ᠥᠪᠡᠷ ᠤᠨ | ᠰᠠᠨᠠᠭᠠ ᠪᠠᠷ ᠢᠶᠠᠨ ᠴᠢᠮᠡᠭᠯᠡᠵᠦ ᠪᠣᠯᠣᠨᠠ︾ ᠭᠡᠲᠡᠯᠡ ᠥᠬᠢᠨ ︽ᠪᠢ ᠭᠠᠭᠴᠠᠭᠠᠷ ᠤᠨᠲᠠᠪᠠᠯ ᠠᠶᠤᠨᠠ︾ ᠭᠡᠴᠢᠬᠡᠪᠡ᠃ ᠡᠪᠦᠯ ᠨᠢ ᠪᠣᠯᠣᠭᠠᠳ ᠲᠡᠷᠡᠬᠦ ᠦᠷᠦᠭᠡ ᠬᠦᠢᠲᠡᠨ᠋ | ᠨᠢ ᠠᠷᠭᠠ ᠦᠭᠡᠢ ᠲᠤᠯᠠ ᠪᠢ ᠶᠠᠭᠤ ᠴᠤ ᠳᠤᠤᠭᠠᠷᠤᠭᠰᠠᠨ ᠦᠭᠡᠢ᠂ ᠬᠤᠨᠢᠨ ᠠᠷᠠᠰᠤᠨ ᠳᠡᠪᠢᠰᠬᠡᠷ ᠢᠶᠠᠨ ᠳᠡᠪᠢᠰᠦᠭᠡᠳ ᠯᠡ ᠠᠷᠭᠠᠯᠠᠵᠤ ᠥᠩᠭᠡᠷᠡᠪᠡ᠃ ᠬᠠᠶᠠ | ᠬᠠᠶᠢᠷᠴᠠᠭ ᠲᠠᠭᠠᠨ ᠪᠠᠶᠢᠭᠠ ᠬᠠᠵᠢᠤᠬᠠᠢ ᠶᠢ ᠬᠠᠷᠠᠭᠠᠳ ᠬᠡᠪᠲᠡᠬᠦ ᠳᠤ ᠪᠢ ᠥᠪᠡᠷ ᠢᠶᠠᠨ ᠪᠠᠰᠠ ᠨᠢᠭᠡ ᠬᠠᠵᠢᠤᠬᠠᠢ ᠪᠣᠯᠴᠢᠬᠠᠭᠰᠠᠨ ᠰᠢᠭ᠋ ᠰᠠᠨᠠᠭᠳᠠᠨᠠ ᠪᠢᠯᠡ᠃ | ᠬᠡᠵᠢᠶᠡ ᠬᠤᠶᠢᠨᠠ ᠨᠢ ᠨᠢᠭᠡ ᠡᠳᠦᠷ ᠬᠠᠳᠠᠮ ᠠᠪᠤ ᠮᠠᠨ ᠤ ᠳᠤ ᠬᠤᠭᠤᠯᠠ ᠢᠳᠡᠬᠦ ᠪᠠᠷ ᠢᠷᠡᠭᠡᠳ ᠬᠠᠵᠢᠤᠬᠠᠢ ᠶᠢᠨ ᠦᠷᠦᠭᠡ ᠪᠠᠷ ᠣᠷᠣᠵᠤ ᠦᠵᠡᠭᠡᠳ᠄ | ︽ᠡᠨᠡ ᠬᠤᠷᠭᠤ ᠨᠤᠭᠤᠳ ᠢ ᠶᠡᠭᠡ ᠰᠠᠶᠢᠬᠠᠨ ᠵᠣᠬᠢᠶᠠᠵᠠᠢ︾ ᠭᠡᠵᠦ ᠮᠠᠭᠲᠠᠪᠠ᠃ | | | |